ვიზის აღება მეტად დამღლელი და მოსაწყენი პროცედურაა. ვინც ხშირად მოგზაურობთ, ალბათ ცუდი სიზმარივით გახსენდებათ გაუთავებელი კითხვარები, სხვადასხვა სახის უამრავი დოკუმენტი და მუდამ ცვალებადი რეგულაციები.

თუმცა, თუ თქვენ უკვე გაიარეთ ეს დამღლელი პროცედურა, შეიძლება მოგზაურობის ახალი შესაძლებლობებისკენაც გაგეხსნათ გზა. ზოგიერთი ქვეყნის ვიზის აღების შემთხვევაში, მფლობელს საშუალება ეძლევა, იმოგზაუროს სხვაგანაც. მაგალითად, თუ თქვენ გაქვთ ამერიკის შეერთებული შტატების ან დიდი ბრიტანეთის ვიზა, გეძლევათ წვდომა მიმართულებების ფართო სპექტრზე. ამ მიმართულებებით გამგზავრება ცალკე ვიზაზე განაცხადის გარეშეც შეგიძლიათ.

აშშ-ის ვიზა საქართველოს მოქალაქეებს საშუალებას აძლევს, იმოგზაურონ ჩრდილოეთ და ცენტრალური ამერიკის ქვეყნებში. ეს მოიცავს პოპულარულ ტურისტულ მიმართულებებს, როგორიცაა მექსიკა, დომინიკის რესპუბლიკა, კოსტა-რიკა, გვატემალა და სხვა.

ბრიტანეთის ვიზით თქვენ შეგიძლიათ ეწვიოთ ბრიტანეთის შორეულ ტერიტორიებს, როგორიცაა ბერმუდა, ანგილია და კაიმანის კუნძულები. თქვენ ასევე შეგიძლია იმოგზაუროთ მაროკოში გამარტივებულად ონლაინ ვიზის მეშვეობით.

აღსანიშნავია, რომ მსგავსი შესაძლებლობები სხვა ქვეყნების ვიზებზეც ვრცელდება. მაგალითად: იაპონია, ავსტრალია, ახალი ზელანდია და კანადა. თუმცა, ბევრი მიმართულება, სადაც ამ ქვეყნების ვიზის მფლობელებს ეძლევათ საშუალება თავისუფლად გადაადგილდნენ, ისედაც თავისუფალია საქართველოს მოქალაქეებისთვის (შენგენის და სამხრეთ ამერიკის ქვეყნები).

შეგახსენებთ რომ ქართული პასპორტი მსოფლიოში ძლიერი პასპორტების 50-ეულშია და მის მფლობელებს შეუძლიათ 73 ქვეყანაში იმოგზაურონ სრულიად უვიზოდ, ხოლო 52 ქვეყანაში გამარტივებული წესით, ელექტრონული ან ადგილზე ვიზის საშუალებით.

მსგავსი ინფორმაციის მისაღებად, თქვენ შეგიძლიათ გაწევრიანდეთ Visa ჯგუფში, სადაც ვიზასთან დაკავშირებულ თემები განიხილება. ხოლო თუ თქვენ კონკრეტული ქვეყნის ვიზის აღებით ხართ დაინტერესებული და გჭირდებათ პროფესიონალების დახმარება, მაშინ შეგიძლიათ მიმართოთ კომპანია eConsul-ს.