რამდენიმე დღის წინ პერუს პოლიციამ მუმია იპოვა, რომელიც დაახლოებით 600-800 წლით თარიღდება. მუმია მიტანის სერვისის Pedidos Ya-ის ჩანთაში იპოვეს, რომელიც სამ კაცს თან ჰქონდა. კაცები ქალაქ პუნოს ერთ-ერთ მიტოვებულ პარკში ალკოჰოლს სვამდნენ, ჩანთით კი მუმიას ატარებდნენ.

26 წლის კაცმა, რომელიც პოლიციის თქმით, ჩანთის მეპატრონეა, განაცხადა, რომ მუმიას "ხუანიტა" დაარქვა და მედიასთან საუბრისას თავისი შეყვარებულიც უწოდა. "სახლში ის ჩემს ოთახშია ხოლმე, ჩემთან ერთად სძინავს და მე მასზე ვზრუნავ", — განაცხადა ჩანთის მეპატრონემ.

ფოტო: Peru's Ministry of Culture

მუმიის დათვალიერების შედეგად გაირკვა, რომ ის ზრდასრული კაცია და სავარაუდოდ, პერუს აღმოსავლეთ რაიონიდანაა. მუმია ამჟამად კულტურის სამინისტროში რჩება და მას ეროვნული კულტურული მემკვიდრეობის სტატუსი უკვე მიანიჭეს. გამოძიება კი ისევ გრძელდება და პოლიცია ცდილობს დაადგინოს, როგორ იპოვა ის 26 წლის კაცმა.

არქეოლოგიური გათხრების შედეგად პერუში რამდენიმე მუმია აქამდეც უპოვიათ, რომლებიც ინკების იმპერიის პერიოდს მიაკუთვნეს. 2021 წელს არქეოლოგებმა 800-1200 წლამდე ასაკის მუმია პერუს დედაქალაქ ლიმას მახლობლადაც იპოვეს.