უკრაინის პრეზიდენტმა ვოლოდიმირ ზელენსკიმ მოქალაქეებს სიმამაცისთვის მადლობა გადაუხადა.

რატომ არის მნიშვნელოვანი: რუსეთის უკრაინაში არაპროვოცირებული, გაუმართლებელი შეჭრიდან და სრულმასშტაბიანი ომის დაწყებიდან, ერთი წელი გავიდა.

  • "უკრაინამ გააოცა მსოფლიო, უკრაინამ შთააგონა მსოფლიო, უკრაინამ გააერთიანა მსოფლიო", — თქვა ზელენსკიმ ვიდეომიმართვაში.

  • უკრაინის პრეზიდენტის თქმით, ამ წლის მთავარი შეჯამებაა, რომ გადარჩნენ, არ დამარცხდნენ — "ჩვენ ყველაფერს გავაკეთებთ, რომ ამ წელს გავიმარჯვოთ".

  • "ეს იყო გამძლეობის წელი. ზრუნვის წელი. სიმამაცის წელი. ტკივილის წელი. იმედის წელი. გამძლეობის წელი. ერთიანობის წელი. უძლეველობის წელი".

დეტალები: ზელენსკიმ გაიხსენა, როგორი იყო მისი პირველი მიმართვა 2022 წლის 24 თებერვალს. ამბობს, რომ მაშინ გაიღვიძეს და აღარ დაუძინიათ.

  • "ჩვენ არ აღვმართეთ თეთრი დროშა და დავიწყეთ ლურჯი და ყვითელის დაცვა. ჩვენ არ გვეშინოდა, არ გავტყდით, არ დავნებდით. ამის სიმბოლო იყო ზმიინის კუნძულის მესაზღვრეები და მარშრუტი, რომლითაც მათ "რუსული ხომალდი" გაგზავნეს";
  • "ჩვენი რწმენა გაძლიერდა. ჩვენი მორალი გაძლიერდა. ჩვენ გავუძელით სრულმასშტაბიანი ომის პირველ დღეს. არ ვიცოდით რა მოხდებოდა ხვალ, მაგრამ ზუსტად მივხვდით: ყოველი ხვალინდელი დღე ღირს ბრძოლად!"

ზელენსკიმ კიდევ ერთხელ აღნიშნა, რომ ოკუპანტები მათ ქვეყანაში დანაშაულებს ჩადიან, მშვიდობიანი მოსახლეობის ხოცავენ, ანადგურებენ ინფრასტრუქტურას.

  • მისი თქმით, უკრაინელები არ დაივიწყებენ და არ აპატიებენ ამ დანაშაულებს ოკუპანტებს.
  • უკრაინის პრეზიდენტმა ხაზი გაუსვა, რომ ყველას, ვინც რუსეთის ტყვეობაშია დაიხსნიან.

გარდა ამისა, უკრაინის პრეზიდენტის განცხადებით, ცხრა წლის წინ მეზობელი იქცა აგრესორად.

  • "ერთი წლის წინ აგრესორი გახდა ჯალათი, მძარცველი და ტერორისტი. ეჭვი არ გვეპარება, რომ პასუხს აგებენ. ეჭვი არ გვეპარება იმაში, რომ ჩვენ გამარჯვება გველოდება", – თქვა ზელენსკიმ.
  • "თითქმის ყველას აქვს ტელეფონში მინიმუმ ერთი კონტაქტი, რომელიც აღარასდროს აიღებს ტელეფონს. არასოდეს უპასუხებს ტექსტურ შეტყობინებას: "როგორ ხარ?";
  • "ჩვენ არ წავშლით მათ სახელებს ტელეფონიდან ან საკუთარი მეხსიერებიდან. ჩვენ მათ არასოდეს დავივიწყებთ. ჩვენ ამას არასოდეს ვაპატიებთ. ჩვენ არ მოვისვენებთ, სანამ რუსი მკვლელები დამსახურებულად არ დაისჯებიან".