CRRC-საქართველომ ომის, რუსეთიდან მომდინარე პოტენციური საფრთხეების და საგარეო პოლიტიკური პერსპექტივის შესახებ საზოგადოებრივი აზრის შესასწავლად, დემოკრატიის ეროვნული ფონდის (NED) ფინანსური მხარდაჭერით, მოსახლეობის წარმომადგენლობითი გამოკითხვა ჩაატარა.

რატომ არის მნიშვნელოვანი: გამოკითხვამ აჩვენა, რომ მოქალაქეების უმრავლესობა საქართველოს ევროკავშირსა და NATO-ში გაწევრიანებას მხარს უჭერს, თუნდაც ამან რუსეთის მხრიდან აგრესიის რისკები გაზარდოს.

• მოქალაქეების აბსოლუტური უმრავლესობა მიიჩნევს, რომ NATO-სა და ევროკავშირის წევრობა ქვეყანას ეკონომიკურ განვითარებას მოუტანს და არ სჯერა, რომ ამის გამო ეროვნულ იდენტობას დაკარგავენ.
• კვლევის თანახმად, მოქალაქეების შედარებით მცირე ნაწილს აქვს მოლოდინი, რომ ევროკავშირთან და NATO-სთან ინტეგრაცია ქვეყნის ტერიტორიული მთლიანობის აღდგენას შეუწყობს ხელს და აფხაზეთსა და ცხინვალის რეგიონს საქართველოს კონტროლის ქვეშ დააბრუნებს.

მოქალაქეებს სთხოვეს აერჩიათ, ორიდან რომელ მოსაზრებას ემხრობიან — "საქართველო მეტ სარგებელს მიიღეს ევროკავშირსა და NATO-ში გაწევრიანებით" და "საქართველო მეტ სარგებელს მიიღებს, თუ რუსეთთან უკეთესი ურთიერთობის ჩამოყალიბების სანაცვლოდ, უარს იტყვის ევროპულ და ევრო-ატლანტიკურ ინტეგრაციაზე".

• 54% ამბობს, რომ საქართველოსთვის სასარგებლოა ევროპული და ევროატლანტიკური ინტეგრაცია.
• გამოიკვეთა, რომ ოპოზიციის მხარდამჭერები, ახალგაზრდები (18-34 წლის), დედაქალაქისა და სხვა ქალაქების მოსახლეობა და უმაღლესი განათლების მქონე პირები უფრო მეტ მხარდაჭერას გამოხატავს EU-სა და NATO-ს ინტეგრაციის მიმართ.

დეტალები: გამოკითხულთა 73% ეთანხმება, რომ ევროკავშირში გაწევრიანება საქართველოს ეკონომიკის განვითარებას შეუწყობს ხელს.

• მონაცემებმა აჩვენა, რომ მოსახლეობის იგივე ჯგუფები, გარდა ახალგაზრდებისა და ქალები უფრო მეტად ეთანხმებიან, რომ NATO-ს წევრობა საქართველოს ტერიტორიული მთლიანობის აღდგენაში ეხმარება.
• გამოვლინდა, რომ ამ განცხადებაზე თანხმობის საერთო დონე უფრო დაბალია (48%) ვიდრე ევროკავშირში გაწევრიანების შედეგად ქვეყნის ეკონომიკური განვითარების შემთხვევაში (73%).

კვლევის თანახმად, მხოლოდ 22% ეთანხმება, რომ თუ ქვეყანა EU-ის წევრი გახდება, ეროვნულ იდენტობას დაკარგავს.

• "მოსახლეობის სხვადასხვა ჯგუფს შორის ქართული ოცნების მხარდამჭერები, ოპოზიციასთან და პარტიებისადმი მიუმხრობლებთან შედარებით, ხოლო საშუალო და პროფესიული განათლების მქონე ადამიანები, უმაღლესი განათლების მქონე ადამიანებთან შედარებით, უფრო მეტად ეთანხმებიან ამ მოსაზრებას", — ვკითხულობთ დოკუმენტში.

კვლევაში მონაწილეებს NATO-ში გაწევრიანების შემთხვევაში რუსეთიდან მომავალ ჰიპოთეტურ საფრთხეებზეც ჰკითხეს.

• როგორც აღმოჩნდა, 71% ეთანხმება, რომ ასეთი საფრთხე არსებობს.
• კვლევის ავტორები, ასევე, დაინტერესდნენ, რომელ ქვეყანასთან ან გაერთიანებებთან უნდა ჰქონდეს საქართველოს ყველაზე მჭიდრო პოლიტიკური თანამშრომლობა.
• პასუხების გადანაწილება იხილეთ ფოტოზე.

მეთოდოლოგია: CRRC-ის ინფორმაციით, მოსახლეობის რაოდენობრივი სატელეფონო გამოკითხვა 2022 წლის 29 აგვისტოდან 5 სექტემბრის ჩათვლით პერიოდში ქართულ, სომხურ, აზერბაიჯანულ და რუსულ ენებზე ჩატარდა.

• ჯამში გამოიკითხა 1 523 ზრდასრული (18 წლის და უფროსი) საქართველოს მოქალაქე.
• გამოკითხვაში გამოყენებულ შერჩევასა და მოსახლეობის დემოგრაფიულ მონაცემებს შორის განსხვავებების კომპენსაციის მიზნით, ანგარიშში შეწონილი შედეგები გაანალიზეს.
• გარდა ამისა, გამოკითხვის ფარგლებში CRRC-საქართველომ რანდომიზებული ექსპერიმენტი ჩაატარა, რომლის ფარგლებში რესპონდენტების ერთმა ჯგუფმა მოისმინა ინფორმაცია, რომელიც უკრაინის წარმატებებს უსვამდა ხაზს, მეორემ — ინფორმაცია, რომელიც აქცენტს უკრაინის დანაკარგებზე აკეთებდა, მესამეს კი დამატებითი ინფორმაცია არ მიუღია.
• ავტორის განცხადებით, ექსპერიმენტმა აჩვენა, რომ მიწოდებული ინფორმაციის შინაარსი გავლენას ახდენს ზოგიერთი ჯგუფის განწყობაზე რუსეთთან კომპრომისის მიმართ.
• მათი თქმით, დანაკარგების შეტყობინებამ ყველაზე საგრძნობი ზეგავლენა იქონია სხვებზე უფრო პროდასავლურად განწყობილ ჯგუფებში, რომლებიც ამავდროულად ყველაზე ნაკლებად უჭერდნენ მხარს რუსეთთან რაიმე კომპრომისს.