ეს პირველი შემთხვევა არ არის, როცა რუსეთის ყოფილი პრეზიდენტი და მოქმედი უშიშროების საბჭოს ხელმძღვანელის მოადგილე ბაქიბუქობს.

რატომ არის მნიშვნელოვანი: მედვედევი უკვე დიდი ხანია ალოგიკურ განცხადებებს აკეთებს, თუმცა დროთა განმავლობაში მისი შეფასებები და სურვილები უფრო და უფრო აგრესიული და არაჰუმანური ხდება.

  • ის ცინიკურად ითხოვს უკრაინის ხელისუფლების დამხობას, "დასჯას" და ამართლებს ყველანაირი ფორმის ძალადობას, რასაც რუსები უკრაინაში ჩადიან.
  • უკრაინამ მასზე ძებნა გამოაცხადა.

დეტალები: ამჯერად RBC-სთან ინტერვიუში მედვედევმა თქვა, რომ თუ უკრაინა ყირიმზე შეტევას შეეცდება, მოსკოვი "საპასუხო დარტყმებს" განახორციელებს.

  • "მთელი უკრაინა, რომელიც კიევის მმართველობის ქვეშ რჩება, დაიწვება", — დაიმუქრა მან.

  • ისევ აპელირებდა, თითქოს რუსეთს საკუთარ ტერიტორიაზე თავდასხმის შემთხვევაში ყველა იარაღის, მათ შორის, ბირთვულის გამოყენება შეუძლია და უკრაინის მიერ ყირიმის დაბრუნების მცდელობების რუსეთისგან რაღაცის მიტაცებად შეფუთვას ცდილობდა.

უკრაინის პრეზიდენტის ადმინისტრაციაში მევდედევის პასუხად საერთაშორისო სამართალი გაიხსენეს და აღნიშნეს, რომ უკრაინას შეუძლია გაათავისუფლოს თავისი ტერიტორიები ნებისმიერი ხელსაწყოების გამოყენებით.

  • "ყირიმი უკრაინაა. ამიტომ რუსი ოფიციალური პირების მუქარა "საპასუხო დარტყმების" შესახებ მხოლოდ დადასტურებაა მასობრივი მკვლელობების განზრახვისა და ტრადიციული რუსული სტილით შეშინების მცდელობაზე. ყოველთვის დააიგნორეთ მედვედევი", — წერს ადმინისტრაციის უფროსის მრჩეველი, მიხაილო პოდოლიაკი.