რუსეთის საგარეო საქმეთა მინისტრის, სერგეი ლავროვის განცხადებას კომუნისტური პარტიის რუსი დეპუტატი, სერგეი გავრილოვიც ეხმაურება.

რატომ არის მნიშვნელოვანი: რუსეთის საგარეო საქმეთა მინისტრმა სერგეი ლავროვმა 18 იანვარს, გამართულ ბრიფინგზე შეაქო საქართველოს მთავრობა და თქვა, რომ სანქციებზე საქართველოს მთავრობის პოზიცია მის "პატივისცემას" იწვევს.

  • ოკუპანტი ქვეყნის საგარეო საქმეთა მინისტრმა, სერგეი ლავროვმა საქართველოსთან პირდაპირი ავიამიმოსვლის აღდგენის იმედი გამოთქვა.
  • საპასუხოდ, ქართულ ოცნებაში თქვეს, რომ თუ ასე მოხდა, ეს მისასალმებელი იქნება.
  • უკრაინის საგარეომ ლავროვისა და კობახიძის განცხადებებს თბილისსა და მოსკოვს შორის რევერანსების გაცვლა უწოდა.

დეტალები: რუსი დეპუტატი ამბობს, რომ აუცილებელია აღდგეს არა მხოლოდ საჰაერო მიმოსვლა, არამედ ქვეყნებს შორის სრულფასოვანი დიპლომატიური ურთიერთობაც.

  • მისი თქმით, საელჩოსა და საკონსულო მომსახურების არსებობა ხელს შეუწყობს კონტაქტების გაფართოებას და შესაძლებლობებს საქართველოში მყოფი რუსეთის მოქალაქეების დახმარების შესაძლებლობების ზრდას.
  • "უკრაინის საკითხზე საქართველოს დამოუკიდებელი პოზიციისა და რუსეთის წინააღმდეგ დაწესებული სანქციების ომისადმი დამოკიდებულების გათვალისწინებით, აუცილებელია არა მხოლოდ საჰაერო მიმოსვლის, არამედ ჩვენს ქვეყნებს შორის დიპლომატიური ურთიერთობების სრული აღდგენა.
  • გავრილოვი ამბობს, რომ ურთიერთობების აღდგენა ვაჭრობის გაზრდასა და ტურიზმის განვითარებასაც შეუწყობს ხელს.
  • "უნდა გაიზარდოს ავიაკომპანიების რაოდენობა, მათ შორის მეგობარი ქვეყნებიდან, რომლებიც განახორციელებენ გადაზიდვებს რუსეთსა და საქართველოს შორის".

გავრილოვის მიერ 2019 წლის 20 ივნისს საქართველოში პარლამენტში თავმჯდომარის სკამის დაკავებას საპროტესტო ტალღა მოჰყვა.

  • მოქალაქეები და ოპოზიციის წევრები პარლამენტის თავმჯდომარის, სუს-ის ხელმძღვანელის და შს მინისტრის გადადგომას ითხოვდნენ.
  • მშვიდობიანი პროტესტი მოგვიანებით დაპირისპირებაში გადაიზარდა და ცენტრალურ გამზირზე მობილიზებულმა სპეცრაზმმა აქციის დაშლა დაიწყო.
  • სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

  • აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ.