ცნობილ ამერიკელ მსახიობს, ალეკ ბოლდუინს, გადასაღებ მოედანზე ოპერატორის სიცოცხლის გაუფრთხილებლობით მოსპობისთვის ბრალი წარედგინება. გადაწყვეტილება ნიუ-მექსიკოს ქალაქ სანტა-ფეს პროკურატურამ 19 იანვარს მიიღო.

იგივე ბრალი წარედგინება გადასაღებ მოედანზე იარაღზე პასუხისმგებელ პირს, ჰანა გუტირეს-რიდს. ამასთან, რეჟისორის ასისტენტმა დევიდ ჰოლსმა ხელი მოაწერა დამნაშავედ აღიარების ცნობას "სასიკვდილო იარაღის დაუდევარი გამოყენებისთვის".

"ამ სამი ადამიანიდან რომელიმეს — ალეკ ბოლდუინს, ჰანა გუტირეს-რიდს ან დევიდ ჰოლსს — რომ საკუთარი საქმე გაეკეთებინა, ოპერატორი ჰალინა ჰაჩინსი დღეს ცოცხალი იქნებოდა", — აცხადებს პროკურატურის წარმომადგენელი ანდრეა რიბი, — "ეს მარტივია".

რიბის თქმით, მტკიცებულებების ანალიზი "ცხადად მიუთითებს, რომ გადასაღებ მოედანზე უსაფრთხოების წესებისადმი დანაშაულებრივ გულგრილობას" ჰქონდა ადგილი.

ფოტო: Jim Weber/The New Mexican

დაკვითხვის შემდეგ პოლიციის შენობიდან გამოსული ალეკ ბოლდუინი.

ფოტო: Jim Weber/The New Mexican

2021 წლის ოქტომბერში, ფილმ Rust-ის გადასაღებ მოედანზე, ალეკ ბოლდუინის მიერ ნასროლ ტყვიას ოპერატორი ჰალინა ჰაჩინსი შეეწირა. ბოლდუინი აცხადებდა, რომ მას სასხლეტისთვის თითი არ გამოუკრავს და ოპერატორი ტრაგიკული შემთხვევის მსხვერპლი გახდა; ხოლო სასამართლო ჩანაწერები მიუთითებდა, მსახიობმა არც იცოდა, გადატენილ იარაღს რომ აწვდიდნენ.

ბრალდებების წარდგენის შემდეგ, პროკურატურა სასამართლოსგან მოელის, რომ არა მხოლოდ შეფასდება ბოლდუინისა და გუტირეს-რიდის წვლილი მომხდარში, არამედ გადაწყვეტენ კიდეც, სიცოცხლის გაუფრთხილებლობით მოსპობის რომელი სახე მიესადაგება ამ შემთხვევას.

აღნიშნული ბრალდება თავისუფლების 18 თვემდე აღკვეთას და $5000-იან ჯარიმას ითვალისწინებს. თუმცა, ყველაზე მძიმე ვერსიაში დამნაშავედ ცნობის შემთხვევაში, ბოლდუინს, გუტირეს-რიდს, ან ორივეს, 5 წლამდე პატიმრობა მიესჯებათ.

ასევე იხილეთ: