ცნობილმა ამერიკელმა ბიზნესმენმა და მსოფლიოში ერთ-ერთმა უმდიდრესმა ადამიანმა, ილონ მასკმა, ცოტა ხნის წინ გინესის მსოფლიო რეკორდი დაამყარა, თუმცა, მისთვის ალბათ არცთუ სასიამოვნო მიღწევით — ქონების უდიდესი დანაკარგით.

ტექ სამყაროში პოპულარულ მასკს 2021 წლის ნოემბრის შემდეგ $182 მილიარდი დაუკარგავს — თუმცა, ზოგიერთი წყაროს ცნობით, ეს რიცხვი შეიძლება $200 მილიარდსაც აღწევდეს.

"მასკის ქონება 2021 წელს ყველაზე მეტს, $320 მილიარდს შეადგენდა, 2023 წლის იანვრის მონაცემებით კი ის $138 მილიარდამდე შემცირდა", — წერია მსოფლიო რეკორდების ანგარიშში, რომელიც Forbes-ის ცნობებს იშველიებს, — "ეს დიდწილად Tesla-ის აქციების ვარდნითაა გამოწვეული".

ანგარიშში მითითებულია, რომ ზუსტი რიცხვების დადგენა რთულია, თუმცა, მათივე ცნობით, მასკის დანაკარგი ბევრად აღემატება ამ მონაცემის წინა რეკორდს — $58,6 მილიარდს, რომელიც იაპონელ ტექ ინვესტორს, მასაიოში სონს დაუკარგავს 2000 წელს.

ფოტო: Mike Blake / Reuters

სხვათა შორის, ილონ მასკმა უკვე რამდენიმე კვირაა, რაც მსოფლიოს უმდიდრესი ადამიანის წოდებაც დათმო. გასული წლის დეკემბერში ეს ტიტული ფრანგმა ბერნარ არნომ დაისაკუთრა, რომელიც სხვადასხვა ბრენდის კონგლომერატ LVMH-ს ფლობს. იანვრის თვის მონაცემებით, არნოს ქონება $203,7 მილიარდს შეადგენს.

აღსანიშნავია ისიც, რომ გასულ წლის შემოდგომაზე მასკმა ერთ-ერთი უდიდესი სოციალური ინტერნეტპლატფორმა ტვიტერი შეიძინა, რაც მას $44 მილიარდად დაუჯდა.