ომის კვლევის ინსტიტუტი აცხადებს, რომ რუსულმა ძალებმა, სავარაუდოდ, დაიკავეს ქალაქი სოლედარი.

რატომ არის მნიშვნელოვანი: სოლედარი დონეცკის ოლქის ქალაქია, რომლისთვისაც ბოლო დროს სასტიკი ბრძოლები მიმდინარეობს.

  • მისმა დაკარგვამ, შესაძლოა, უკრაინულ ჯარებს გაურთულოს ბევრად უფრო დიდი ბახმუტის დაცვა, რომელსაც რუსები უკვე თვეებია შტურმით ებრძვიან.

ომის კვლევის ინსტიტუტი: ISW-ის დასკვნით, ყველა არსებული მტკიცებულება მიუთითებს იმაზე, რომ უკრაინული ძალები აღარ ინარჩუნებენ ორგანიზებულ თავდაცვას სოლედარში.

  • თუმცა, მათი შეფასებით, სოლედარის, დაახლოებით 14,2 კვ.კმ-ის ფართობის დასახლების დაკავება რუსულ ძალებს საშუალებას არ მისცემს გააკონტროლონ უკრაინის კრიტიკული სახმელეთო საკომუნიკაციო ხაზები ბახმუტში.
  • შესაბამისად, ნაკლებად სავარაუდოა ამას მოჰყვეს ბახმუტის გარდაუვალ ალყაში მოქცევა.
  • "რუსულმა ძალებმა შეიძლება გადაწყვიტონ, რომ შეინარჩუნონ თავდასხმების მუდმივად მაღალი ტემპი ბახმუტის რაიონში, მაგრამ რუსული ძალების დეგრადირებული საბრძოლო ძალა და კუმულაციური ამოწურვა ხელს შეუშლის ამ თავდასხმებს ოპერაციულად მნიშვნელოვანი შედეგების მოტანაში", — იტყობინება ISW.

ამასთანავე, უკრაინის თავდაცვის მინისტრის მოადგილის განცხადებით, დონეცკის ოლქის სოლედარში რთული ღამე იყო, მაგრამ ბრძოლები გრძელდება და უკრაინელები თავდაცვის შენარჩუნებას ცდილობენ.

  • 12 იანვარს უკრაინის გენერალურმა შტაბმა გაავრცელა ინფორმაცია, რომ უკრაინულმა ძალებმა მოიგერიეს რუსული თავდასხმები სოლედარის ჩრდილო-დასავლეთით ერთი კილომეტრის მანძილზე.

  • 13 იანვრის მიმოხილვაში, უკრაინის გენერალურმა შტაბს არ განუცხადებია, რომ უკრაინულმა ძალებმა მოიგერიეს თავდასხმები სოლედარზე, როგორც ამას ადრე აკეთებდნენ.