თბილისში, მთავრობის კანცელარიასთან ამ წუთებში არასამთავრობო ორგანიზაციების დახმარებით იმართება აქცია თურქეთის მოთხოვნით დაკავებული თურქი მასწავლებლის, მუსტაფა ემრე ჩაბუქის მხარდასაჭერად. მუსტაფა ემრე ჩაბუქი თბილისში 15 წელია ოჯახთან ერთად ცხოვრობს, ის დემირელის კოლეჯის ერთ-ერთი მენეჯერია.

ჟურნალისტებთან საუბრისას, ჩაბუკის ცოლმა, თუბა ჩაბუქმა მადლობა გადაუხადა აქციის ორგანიზატორებს:

"ჩემი ყველაზე დიდი სურვილია გაიმარჯვოს სამართლიანობამ, გუშინ მოვითხოვეთ ლტოლვილის სტატუსი და იმედი გვაქვს, ჩვენს მოთხოვნას დააკმაყოფილებენ".

აქციის მონაწილეთა მთავარი მოთხოვნაა, არ გადაეცეს ჩაბუქი თურქეთის ხელისუფლებას, რადგან ის შეიძლება წამებისა და არაადამიანური მოპყრობის მსხვერპლი აღმოჩნდეს თურქეთის ციხეში ისევე, როგორც ეს დაემართა თურქეთის ხელისუფლებისთვის არასასურველ აერაერთ პირს.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. ადვოკატის თქმით, ბრალდების თანახმად, მუსტაფა ემრე თითქოს ეხმარებოდა ერთ-ერთ ტერორისტულ ორგანიზაციას და ეს ორგანიზაცია მოხსენიებულია, როგორც "ფეთულა გიულენის მიმდევრები". კერძოდ, ადვოკატის თქმით, ბრალდების მასალებში აღნიშნულია, რომ მუსტაფა ემრე ჩაბუქს ბრალად ედება, თითქოს, ის ეხმარებოდა დემირელის კოლეჯის ერთ-ერთ პარტნიორს, რათა 2017 წელს გაესხვისებინა წილი ერთ-ერთ ამერიკულ კომპანიაზე.

მუსტაფა ემრე ჩაბუქს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მოსამართლემ პროკურატურის შუამდგომლობა დააკმაყოფილა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ