პრეზიდენტი მიიჩნევს, რომ საქართველოს საერთაშორისო რეპუტაცია ზიანდება ყოველ დღე, სანამ საზოგადოება, თბილისიდან გატაცებული აფგან მუხტარლის საქმესთან დაკავშირებით, კითხვებზე პასუხს არ მიიღებს. ამის შესახებ პრეზიდენტის პრესსპიკერმა, ეკა მიშველაძემ დღეს გამართულ ბრიფინგზე განაცხადა:

"დღეს ჩვენ ყველანი - ხელისულფლებაც და საზოგადოებაც, ვიმყოფებით ამ შელახული იმიჯის დაძლევის კრიზისულ ეტაპზე და რაც უფრო დიდ ხანს გაგრძელდება პროცესი, რაც უფრო ხშირად მოისმენს საზოგადოება არაადეკვატურ კომენტარებს, მით უფრო საზიანოა ეს ქვეყნისთვის. ყოველი დღე, რომელიც პასუხს არ სცემს საზოგადოებაში გაჩენილ კითხვებს, კიდევ უფრო მეტად აყენებს ზიანს ჩვენი ქვეყნის საერთაშორისო რეპუტაციას."

მიშველაძის თქმით, ის, რომ საქართველო არ არის ქვეყანა, სადაც ჟურნალისტებს დევნიან, ქართველი ხალხის მონაპოვარია, აზერბაიჯანელი ჟურნალისტის გატაცებამ კი ქვეყნის იმიჯი მნიშვნელოვნად დააზიანა.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს.