ყოველ წელს ახლავს დანაკლისი, თუმცა, ყველაზე მძიმე, რასაკვირველია, ადამიანური დანაკარგია. გამონაკლისი არც 2022 ყოფილა — გასულ წელს მსოფლიოში არაერთი ცნობილი ხელოვანი, სპორტსმენი თუ სხვა სფეროში წარმატებული ადამიანი გარდაიცვალა. მათმა დიდმა ნაწილმა მსოფლიოს უკეთესი ხვალინდელი დღის შექმნაში მნიშვნელოვანი წვლილი შეიტანა. ამდენად, წლის მიწურულს, დროა, იმ ცნობილი ადამიანების სახელებს გადავავლოთ თვალი, რომლებიც ბოლო 12 თვის განმავლობაში დაიღუპნენ.

1. ნიკა ქაცარიძე

ნიკა ქაცარიძე, რომელიც 2005 წლიდან რუსთაველის თეატრის მსახიობი გახლდათ, 5 იანვარს, 43 წლის ასაკში გარდაიცვალა. ქაცარიძეს ქართველი ტელემაყურებელიც კარგად იცნობდა სერიალებიდან ჩემი ცოლის დაქალები და შუა ქალაქში.

2. სიდნი პუატიე

ამერიკელი კინოვარსკვლავი, რომელიც თავის დროზე ოსკარის ლაურეატი პირველი შავკანიანი მსახიობი გახდა, 6 იანვარს, 94 წლის ასაკში გარდაიცვალა. კიდევ არაერთი პრესტიჟული ჯილდოს მფლობელი მსახიობი დიპლომატიურ სფეროშიც მოღვაწეობდა და წლების განმავლობაში ბაჰამის კუნძულების ელჩი იყო იაპონიასა და UNESCO-ში.

3. პიტერ ბოგდანოვიჩი

სერბული წარმოშობის ამერიკელი რეჟისორი და სცენარისტი პიტერ ბოგდანოვიჩი 6 იანვარს, 82 წლის ასაკში გარდაიცვალა. თავისი მრავალწლიანი კარიერის განმავლობაში რეჟისორმა არაერთი გამორჩეული ფილმი შექმნა, მათ შორის უკანასკნელი კინოსეანსი, რომელმაც 1972 წელს ოსკარის 8 ნომინაცია დაიმსახურა.

4. რეზო ამაშუკელი

ქართველი პოეტი 10 იანვარს, 85 წლის ასაკში გარდაიცვალა. გალაკტიონ ტაბიძის პრემიის ლაურეატი ამაშუკელის ლექსები რამდენიმე პოეტურ კრებულშია თავმოყრილი.

5. გასპარ ულიელი

ცნობილი ფრანგი მსახიობი, რომელსაც კინომოყვარულების დიდი ნაწილი პიტერ უებერის Hannibal Rising-იდან იცნობდა, 19 იანვარს, 37 წლის ასაკში დაიღუპა უბედური შემთხვევის შედეგად. ულიელს სამთო კურორტზე თხილამურებით სრიალისას სხვა მოთხილამურე დაეჯახა, რის შემდეგაც მან თავის ტვინის მძიმე ტრავმა მიიღო. მსახიობი საავადმყოფოში ვერტმფრენით გადაიყვანეს, მაგრამ მისი გადარჩენა ვეღარ მოხერხდა.

6. მონიკა ვიტი

იტალიური კინოს ლეგენდად მიჩნეული მსახიობი 2 თებერვალს, 90 წლის ასაკში გარდაიცვალა. ვიტის საყოველთაო აღიარება 1960 წელს გამოსულ ფილმში L'Avventura ("თავგადასავალი") შესრულებულმა როლმა მოუტანა.

7. ტიერი მუგლერი

მოდის ფრანგი დიზაინერი და ბრენდ მუგლერის დამფუძნებელი 23 იანვარს, 73 წლის ასაკში გარდაიცვალა. მუგლერმა საკუთარი ბრენდი 1973 წელს დააარსა და მსოფლიოში მაღალი მოდის ერთ-ერთ ყველაზე გავლენიან ფიგურადაც იქცა. დიზაინერობის გარდა, იგი რეჟისორი, ფოტოგრაფი, მოცეკვავე და აკრობატიც გახლდათ.

8. ლუი ანდერსონი

ყველასთვის საყვარელი ანიმაციური სერიალის რეალური გმირი 21 იანვარს, 68 წლის ასაკში გარდაიცვალა. ემის სამგზის ლაურეატ მსახიობს მაყურებელი ყველაზე მეტად მის ბავშვობაზე შექმნილი ანიმაციური სერიალით, ცხოვრება ლუისთან ერთად, იცნობდა. თუმცა, ამის გარდა, ანდერსონს საკუთარი სიტკომიც ჰქონდა და მონაწილეობდა სხვადასხვა შოუში.

9. მადლენ ოლბრაიტი

აშშ-ის პირველი ქალი სახელმწიფო მდივანი 23 მარტს, 84 წლის ასაკში გარდაიცვალა. ოლბრაიტი, რომელმაც დიდი წვლილი შეიტანა ამერიკული დიპლომატიის განვითარებაში, მუდმივად უჭერდა მხარს ადამიანის უფლებებისა და დემოკრატიის დაცვას მთელ მსოფლიოში.

10. თემურ ჩხეიძე

ქართველი რეჟისორი, რომელსაც 80-მდე სპექტაკლი აქვს დადგმული, 5 ივნისს, 78 წლის ასაკში გარდაიცვალა. ხანგრძლივი კარიერის განმავლობაში ჩხეიძე არაერთ თეატრთან თანამშრომლობდა. სხვადასხვა პრემიის ლაურეატს 2010 წელს თბილისის საპატიო მოქალაქის წოდებაც მიენიჭა.

11. ენდრიუ ფლეტჩერი

ინგლისელი მუსიკოსი და ლეგენდარული Depeche Mode-ის ერთ-ერთი დამფუძნებელი წევრი 26 მაისს, 60 წლის ასაკში დაიღუპა.

12. რეი ლიოტა

ოქროს გლობუსის ნომინანტი ამერიკელი მსახიობი, რომელიც ყველაზე მეტად მარტინ სკორსეზეს Goodfellas-სა და ჯო ჯექსონის Field of Dreams-ში შესრულებული როლებითაა ცნობილი, 26 მაისს, 67 წლის ასაკში გარდაიცვალა. ლიოტა დომინიკის რესპუბლიკაში დაიღუპა, სადაც ფილმ Dangerous Waters-ის გადაღებებისთვის იმყოფებოდა.

13. ვანგელისი

ოსკაროსანი ბერძენი კომპოზიტორი ევანგელოს ოდისეას პაპათანასიუ 17 მაისს, 79 წლის ასაკში გარდაიცვალა. ვანგელისმა ისეთი ცნობილი ფილმებისთვის შექმნა მუსიკა, როგორიცაა Blade Runner და Chariots of Fire. ამ უკანასკნელისთვის მუსიკოსმა 1981 წელს ამერიკული კინოაკადემიის ჯილდო მიიღო, ფილმში გამოყენებული კომპოზიცია კი ჩარტების სათავეში მოექცა.

14. კაილია პოუზი

რეალითი შოუს ვარსკვლავი და ინტერნეტში პოპულარული მიმის გმირი, კაილია პოუზი, 2 მაისს, 16 წლის ასაკში დაიღუპა.

15. ნიშელ ნიკოლსი

ამერიკელი მსახიობი და Star Trek-ის ვარსკვლავი 30 ივლისს, 89 წლის ასაკში გარდაიცვალა. ნიშელ ნიკოლსი ერთ-ერთი პირველი შავკანიანი მსახიობი ქალი იყო, რომელმაც სერიალში მნიშვნელოვანი პერსონაჟი განასახიერა. ამას გარდა, ნიშელი Star Trek-ის 6 ფილმში მონაწილეობდა.

16. პოლ სორვინო

მარტინ სკორსეზეს Goodfellas-ის კიდევ ერთი მსახიობი, პოლ სორვინო, 25 ივლისს გარდაიცვალა 83 წლის ასაკში. ამ ფილმის გარდა, მსახიობმა კიდევ არაერთი დასამახსოვრებელი როლი შექმნა თითქმის ნახევარსაუკუნოვანი კარიერის განმავლობაში.

17. Coolio

ამერიკელი რეპერი, რომელსაც მსოფლიოში ცნობილი ჰიტით Gangsta's Paradise იცნობენ, 28 სექტემბერს დაიღუპა 59 წლის ასაკში. ქულიომ კარიერა 1980-იანებში დაიწყო და მალევე იქცა ჰიპ-ჰოპ ინდუსტრიის გამორჩეულ ფიგურად.

18. ჟან-ლუკ გოდარი

ფრანგული კინოს ლეგენდა 13 სექტემბერს, 91 წლის ასაკში გარდაიცვალა. გოდარმა საყოველთაო აღიარება ჯერ კიდევ სადებიუტო ნამუშევრით, 1960 წელს გამოსული ფილმით Breathless მოიპოვა.

19. დედოფალი ელიზაბეთ II

თანამედროვეობისა და ბრიტანული მონარქიის ერთ-ერთი ყველაზე გავლენიანი ფიგურა 8 სექტემბერს, 96 წლის ასაკში გარდაიცვალა. ელიზაბეთ II, რომელიც გაერთიანებული სამეფოსა და თანამეგობრობის წინამძღოლი 70 წელზე მეტი ხნის განმავლობაში გახლდათ, ბრიტანეთის ისტორიაში ერთ-ერთი ყველაზე დღეგრძელი მონარქიც იყო. მის გარდაცვალებას მთელ მსოფლიოში უამრავი ცნობილი ადამიანი გამოეხმაურა.

20. რობი კოლტრეინი

ცნობილი შოტლანდიელი მსახიობი, რომელსაც ჰარი პოტერის ფილმების სერიაში შესრულებული რუბეუს ჰაგრიდის როლით იცნობდა ყველა თაობის მაყურებელი, 14 ოქტომბერს, 72 წლის ასაკში გარდაიცვალა. პოტერიადის გარდა, კოლტრეინმა კინოისტორიაში სხვა არაერთი გამორჩეული როლიც შექმნა. 2006 წელს იგი ბრიტანეთის იმპერიის ორდენითაც დაჯილდოვდა.

21. პელე

ფეხბურთის ბრაზილიელი ლეგენდა 29 დეკემბერს გარდაიცვალა 82 წლის ასაკში. პელე, რომლის სახელიც ბოლო ათწლეულებში ფეხბურთის სინონიმად იქცა, ამ დრომდე ერთადერთია, ვინც მუნდიალი სამჯერ მოიგო.

22. ვივიენ ვესტვუდი

29 დეკემბერს გარდაიცვალა ლეგენდარული ინგლისელი დიზაინერი ვივიენ ვესტვუდიც. ვესტვუდმა გასული საუკუნის 70-იან წლებში უდიდესი წვლილი შეიტანა პანკ კულტურის განვითარებაში. თუმცა, დიზაინერის გამორჩეული ხელწერით მოხიბლულები იყვნენ, როგორც პანკები, ასევე სამეფო ოჯახის წევრები.