კრემლი აცხადებს, რომ აშშ-ის მიერ უკრაინისთვის პატრიოტის რაკეტის მიწოდება მათ სამხედრო მიზნებს ხელს ვერ შეუშლის.

რატომ არის მნიშვნელოვანი: "მსოფლიოს მეორე არმია" და მისი შესაძლებლობები სამხედრო ექსპერტებმა არაერთხელ შეაფასეს როგორც მოძველებული, მწყობრიდან გამოსული და არაეფექტური.

  • მობილიზაციის პროცესში, რუსეთში სამხედრო რესურსებისა და საომარი სულისკვეთების შესამჩნევი დეფიციტი გამოვლინდა.
  • უკრაინის წარმატებული კონტრშეტევის და გაჭიანურებული "სპეციალური სამხედრო ოპერაციის" ფონზე პუტინმა საომარი რიტორიკა შეარბილა.
  • თუმცა, კრემლის ლიდერი უკრაინისთვის პატრიოტის თავდაცვის სისტემის გადაცემამ და აშშ-ში წარმატებულმა ვიზიტმა, როგორც ჩანს მაინც ააფორიაქა და კომენტარმაც არ დააყოვნა.

დეტალები: "პატრიოტის საჰაერო თავდაცვა მოძველებულია. ანტიდოტი ყოველთვის მოიძებნება... რუსეთი ჩამოაგდებს პატრიოტის სისტემას", — განაცხადა კრემლის ლიდერმა ხუთშაბათის პრეს-კონფერენციაზე.

  • რუსეთის პრეზიდენტმა თქვა, რომ "ყველა შეიარაღებული კონფლიქტი მოლაპარაკებების გზით მთავრდება", შემდგომ კი ივარაუდა, რომ უკრაინა საბოლოოდ იძულებული იქნება მშვიდობის სანაცვლოდ ტერიტორიები დათმოს.

ფოტო: Reuters

პატრიოტის სარაკეტო თავდაცვის სისტემა აშენებულია Raytheon Technologies Corp-ის (RTX.N) მიერ და ითვლება ერთ-ერთ ყველაზე მოწინავე საჰაერო თავდაცვის სისტემად.

  • ეს არის მობილური სისტემა, რომელიც ჩვეულებრივ მოიცავს მძლავრ რადარს, საკონტროლო სადგურს, დენის გენერატორს, გამშვებ სადგურებს და სხვა დამხმარე მანქანებს.
  • სტრატეგიული და საერთაშორისო კვლევების ცენტრის ცნობით, ახლად წარმოებული ერთი პატრიოტის ბატარეა $1 მილიარდზე მეტი ღირს, ასევე სისტემისთვის საჭიროა $400 მილიონი და ბატარეის რაკეტებისთვის $690 მილიონი.
  • Raytheon-მა ააშენა 240-ზე მეტი Patriot სისტემა და მას ამჟამად იყენებენ 18 ქვეყანაში.