ცნობილი ადამიანების დაქამინგაუთებას საზოგადოების გარკვეულ ჯგუფებში კვლავაც არაერთგვაროვანი გამოხმაურება მოსდევს ხოლმე. ამდენად, ვარსკვლავებისთვის ეს ხშირად არაა ადვილად გასადგმელი ნაბიჯი. თუმცა, 2022 წელსაც არაერთმა მათგანმა გადაწყვიტა, საკუთარ სექსუალობასა თუ გენდერულ იდენტობაზე ღიად ესაუბრა.

1. რებელ უილსონი

ცნობილი ავსტრალიელი მსახიობი და კომიკოსი რებელ უილსონი ივნისის თვეში დაქამინგაუთდა. უილსონმა პრაიდის თვის აღსანიშნავად ინსტაგრამზე პოსტი გამოაქვეყნა და თავისი პარტნიორის ვინაობაც გაგვიმხილა — იგი სამოსის ბრენდის დამფუძნებელი რამონა აგრუმა გახლავთ.

"მეგონა, დისნეის პრინცს ვეძებდი... თუმცა, იქნებ მთელი ეს დრო მხოლოდ დისნეის პრინცესა მჭირდებოდა", — დაწერა მსახიობმა ინსტაგრამპოსტში ჰეშტეგით #loveislove ("სიყვარული სიყვარულია").

2. ემელი სანდე

შოტლანდიელმა მომღერალმა და კომპოზიტორმა გაზაფხულზე ერთ-ერთ ინტერვიუში განაცხადა, რომ რომანტიკული ურთიერთობა აქვს პიანისტ იოანა კარემოვასთან. მომღერლის თქმით, ამ ურთიერთობაში იგი "უბედნიერესია".

ფანის შეკითხვაზე კი, აიდენტიფიცირებს თუ არა მომღერალი თავს ბისექსუალად, სანდემ შესაფერისი პასუხი გასცა.

"არ ვარ დარწმუნებული, როგორ ვაიდენტიფიცირებ თავს, მაგრამ, მგონი, ასეა. უბრალოდ, ვფიქრობ, რომ უნდა მიყვარდეს ნებისმიერი, ვინც შემიყვარდება".

3. დარია კასატკინა

რუსი ჩოგბურთელი ივლისის თვეში ლესბოსელად დაქამინგაუთდა და განაცხადა, რომ მისი პარტნიორი ფიგურულად მოსრიალე ნატალია ზაბიიაკოა. მოგვიანებით, მან ინსტაგრამზეც გამოაქვეყნა ზაბიიაკოსთან გადაღებული ფოტო.

"კარადაში ცხოვრება შეუძლებელია", — განაცხადა კასატკინამ, — "დიდი ხნის განმავლობაში, მით უმეტეს; ძალიან რთულია და უაზრო. ყოველთვის ამაზე იქნები ჩაციკლული, სანამ დაქამინგაუთებას არ გადაწყვეტ. რა თქმა უნდა, შენზეა დამოკიდებული, ამას როგორ გააკეთებ და რამდენს გაუმხელ სხვებს. ყველაზე მნიშვნელოვანი საკუთარ თავთან ჰარმონიაში ცხოვრებაა".

კასატკინა შეეხო ლგბტქ თემის რთულ მდგომარეობასაც რუსეთში და თავისი ქვეყნის პოლიტიკა გააკრიტიკა. ამავე ინტერვიუში გააკრიტიკა მან ასევე რუსეთის შეჭრა უკრაინაში და უკრაინელ ხალხს სოლიდარობა გამოუცხადა.

4. ჯანელ მონეი

ცნობილი ამერიკელი მომღერალი 2022 წლის აპრილში არაბინარული გენდერული იდენტობის მქონე პირად დაქამინგაუთდა.

"საკუთარ თავს მხოლოდ ქალად არ აღვიქვამ", — განაცხადა მონეიმ, — "ვფიქრობ, ღმერთი ქალზე ან კაცზე მეტია და თუ მეც ღმერთის შექმნილი ვარ, ყველაფერს წარმოვადგენ".

5. ჯენა მელოუნი

მსახიობი ჯენა მელოუნი, რომელსაც ბევრი თქვენგანი ალბათ შიმშილის თამაშებში შესრულებული ჯოანა მეისონის როლით იცნობს, აგვისტოში დაქამინგაუთდა. მელოუნმა განაცხადა, რომ თავის სექსუალობაზე სასაუბროდ ახალ გზას ეძებდა, სიტყვები კი "მიმართულების მისაცემად სჭირდებოდა და არა საკუთარი თავის განსასაზღვრად".

"ვპოულობ სიტყვებს, რომლებიც უფრო შესაფერისია. პანსექსუალობა. საპიოსექსუალობა. პოლიამორია".

6. სინთია ერივო

ოსკარის ნომინანტმა მსახიობმა, რომელსაც კინომოყვარულების უმეტესობა ჰარიეტში შესრულებული მთავარი როლით იცნობს, თავის სექსუალობაზე ღიად ზაფხულის ბოლოს, ბრიტანულ Vogue-თან ისაუბრა.

ინტერვიუში ერივომ აღნიშნა, რომ დიდი ხანი დასჭირდა, სანამ იტყოდა, რომ ბისექსუალია.

"ლგბტქ ადამიანებს ჯერ კიდევ გვჭირდება გამუდმებით იმის მტკიცება, რატომ ვიმსახურებთ თანასწორუფლებიანობას, მაშინ, როცა ერთადერთი განსხვავება ისაა, რომ სხვაგვარად გვიყვარს და სხვაგვარად გამოვხატავთ საკუთარ თავს", — ამბობს მსახიობი.

7. უილოუ შილდსი

შიმშილის თამაშების კიდევ ერთი ვარსკვლავი, რომელიც წელს დაქამინგაუთდა, უილოუ შილდსია. ცნობილ დისტოპიურ ფილმებში ქეთნის ევერდინის დის, პრიმის, როლის შემსრულებელმა მსახიობმა პრაიდის თვის აღსანიშნავად ინსტაგრამზე პოსტი გამოაქვეყნა და განაცხადა, რომ ბისექსუალია.

8. ემიბეთ მაკნალტი

ბისექსუალად დაქამინგაუთდა ასევე კიდევ ერთი ახალგაზრდა მსახიობი, ემიბეთ მაკნალტი, რომელიც ნეტფლიქსის სერიალ Anne with an E-დან გემახსოვრებათ.

"როცა წინათ გითხარით, რომ თქვენი მესმოდა, ეს იმიტომ, რომ ერთ-ერთი თქვენგანი ვარ", — დაწერა მაკნალტიმ ინსტაგრამზე, — "ვიცი, რამდენად რთულია ამ გზის გავლა, მაგრამ გთხოვთ, გახსოვდეთ, რომ ყველაფერი კარგად იქნება. მე 8 წელზე მეტი დამჭირდა, რათა ბოლომდე გამეგო სიმართლე, ახლა კი ამის მჯერა".