კოლორადოს კლდოვან მთებთან ახლოს, უზარმაზარ შენობაში თანამედროვე კოსმოსური მეომრები დღეებს ატარებენ იმის დაგეგმვაში, თუ როგორ დაიცვან აშშ-ს სამხედროები არამიწიერ ცივილიზაციასთან ომის დროს.

მათ კოსმოსურ აგრესორებს უწოდებენ.

მათი მისიაა, მოდელირებული კოსმოსური ომების დროს მტრის მსგავსად მოიქცნენ, რათა აშშ-ს დანაყოფებს იმ კონფლიქტისთვის მომზადებაში დაეხმარონ, რომელიც ერთ დღეს შეიძლება მთელ კოსმოსს მოედოს.

„ჩვენ ცუდი ბიჭების როლი გვაქვს. ჩვენი მოვალეობაა, არა მხოლოდ სიღრმისეულად გავიაზროთ სხვადასხვა ტიპის საფრთხეები და მტრები, არამედ ზუსტად გავიმეოროთ მათი სავარაუდო ქცევები, რაც „კარგ ბიჭებს“ დაეხმარება“. - ამბობს კაპიტანი კრისტოფერ ბარნსი, კოსმოსური აგრესორების 26-ე დივიზიონის ტრენინგის უფროსი.

კოსმოსური აგრესორების 26-ე და 527-ე დივიზიონების მთავარი ადგილსამყოფელი კოლორადოს შრიევას საჰაერო ძალების ბაზაში მდებარე ორსართულიანი უზარმაზარი შენობაა, რომელიც ძლიერი რადიო და თანამგზავრული მოწყობილობებითაა აღჭურვილი. შენობის მეტსახელი საჯინიბოა. მის უკან არსებული ანტენა თეფშები ცას აკონტროლებენ.

მიუხედავად იმისა, რომ კოსმოსური აგრესორების თავდასხმები სიმულირებულია, აშშ-ს სამხედროები და დაზვერვის ოფიცრები გვაფრთხილებენ, რომ ამის საფრთხე კოსმოსში ძალიან რეალურია.

ამერიკა თავისი ძალების წარმოსაჩენად მეტად დამოკიდებულია კოსმოსურ აქტივობებზე, დაწყებული რაკეტების გაშვებით და დამთავრებული ზღვებში მდებარე სამხედრო გემების მართვით.

ზოგს იმის ეშინია, რომ ამერიკის თანამგზავრებისა და მიწაზე არსებული უზარმაზარი კავშირის სისტემების დაზიანებამ შესაძლოა აშშ-ს სამხედრო ძალები დამიზნების, კომუნიკაციებისა და ნავიგაციების სისტემები ანტიკურ ხანაში დააბრუნოს - რაც აშშ-ს საბრძოლო უპირატესობას საგრძნობლად დაწევს.

ამ გაზაფხულზე, აშშ-ს სამხედრო ოფიცრების რიტორიკაში აშკარად შეიმჩნეოდა ამერიკული თავდაცვითი პოზიციების და მოიერიშე შესაძლებლობების გაძლიერება კოსმოსში. მიზეზი კი ის არის, რომ რუსეთი და ჩინეთი სწრაფად ავითარებენ ანტი-სატელიტურ იარაღებს.

„მიუხედავად იმისა, რომ ამჟამად კოსმოსური ომი არ გვაქვს, ვერც იმას ვიტყოდი, რომ მშვიდობა გვაქვს-მეთქი. ჩვენ უნდა მოვემზადოთ ისეთი კონფლიქტისთვის, რომელიც კოსმოსში გაგრძელდება“, ამბობს ვიცე-ადმირალი ჩარლზ რიჩარდი.

ინტერვიუში ვიცე-ადმირალმა რიჩარდმა პრესას განუცხადა, რომ ჩინეთი ლაზერების, ელექტრომაგნიტური რელსური ქვემეხისა და მაღალი სიმძლავრის მიკროტალღური იარაღების არსენალს ავითარებს, რათა გაანეიტრალოს ამერიკის დაზვერვა, კომუნიკაციები და სანავიგაციო თანამგზავრები“.

აპრილში, Stracom-ის მეთაურმა, გენერალმა ჯონ ჰაიტენმა სენატის კომიტეტის მოსმენაზე განაცხადა, რომ გარდა თავდაცვითი პოზიციების გაძლიერებისას, აშშ-ს მოიერიშე შესაძლებლობები ისეთი უნდა იყოს, რომ სხვების იმავე ტიპის ტექნოლოგიებს შესაფერისი კონკურენცია გაუწიოს.

ამ მოსმენაზე, სენატორმა ტედ კრუზმა გენერალ ჰაიტენს სთხოვა, განესაზღვრა ამერიკის კოსმოსური საფრთხე ისეთი ქვეყნებისგან, როგორებიცაა რუსეთი და ჩინეთი.

„ეს საფრთხე შესამჩნევი და ზრდადია. ჰკითხე საკუთარ თავს, რატომ გვყავს მტრები, რომლებიც აგებენ იარაღს კოსმოსში: იარაღებს, რომლებსაც შეუძლია კოსმოსში გაშლა; იარაღებს, რომელთაც შეუძლიათ გადატვირთოს ჩვენი თანამგზავრები და GPS სისტემები. რატომ აშენებენ ისინი მთელ ამ ინფრასტრუქტურას? ეს არ ხდება იმიტომ, რომ ისინი უბრალოდ დაინტერესებულნი არიან გარე კოსმოსის მშვიდობიანი გამოყენებით. ეს ხდება იმიტომ, რომ მათ ამერიკის შეერთებული შტატების შეშინება უნდათ“, - უპასუხა ჰაიტენმა.

კოსმოსური აგრესორების მიზანი ისეთი თავდასხმების სიმულირებაა, რომელიც შესაძლოა აშშ-ს მტრებმა გამოიყენონ.

თუმცა ამ ოპერაციების შესახებ უამრავი დეტალი საიდუმლოდ რჩება.