შინაგან საქმეთა მინისტრის მოადგილემ, შალვა ხუციშვილმა დღეს აზერბაიჯანელი ჟურნალისტის აფგან მუხტარლის საქმეზე ისაუბრა ქრონიკის ეთერში და განაცხადა, რომ ბევრი ურთიერთგამომრიცხავი ინფორმაცია ვრცელდება, მათ შორის ის რომ დაკავებულს სხეულზე დაზიანებები ჰქონდა. მისი თქმით, აზერბაიჯანის ხელისუფლებამ მოაწოდან მათ ინფორმაცია რომ აფგან მუხტარლის საერთოდ არ ჰქონია ჯანმრთელობის პრობლემა:

"ურთიერთგამომრიცხავი ინფორმაციები ვრცელდება, იგივე თუნდაც მუსტაფაევას ადვოკატები და ოჯახის წევრები აცხადებდნენ, რომ მას ჰქონდა დაზიანებები, თუმცა ოფიციალური ინფორმაცია, ის რომ აზერბაიჯანის ხელისუფლების და მათი ექიმების შესწავლით, დაზიანებები საერთოდ არ ჰქონია. ეს არის ძალიან სენსიტიური ინფორმაცია - ერთი მხრივ საქმე ეხება ჟურნალისტს და მეორე მხრივ ჩვენს კოლეგა სამართალდამცავ უწყებებს სხვა ქვეყანაში".

მუხტარლის აზერბაიჯანელი, ადვოკატი მემატ ქარიმლი, რომელიც თბილისში დღეს ჩამოვიდა აცხადებს, რომ დაკავებიდან ორი-სამი დღე, აფგან მუხტარლისთვის სამედიცინო მომსახურება არ გაუწევიათ. ხოლო, წითელი ჯვრის წარმომადგენლებს მისი მონახულების უფლება არ მისცეს. მისივე ინფორმაციით, აფგანს დღემდე ეტყობა სხეულზე ფიზიკური დაზიანებები.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.