არასამთავრობო ორგანიზაციების ნაწილი ევროკომისიის პრეზიდენტს ურსულა ფონ დერ ლაიენსა და ევროკომისარს სამეზობლო პოლიტიკისა და გაფართოების საკითხებში ოლივერ ვარჰეის ერთობლივი განცხადებით მიმართავს.

რატომ არის მნიშვნელოვანი: 23-24 ივნისს გამართულმა ევროპულმა საბჭომ ასოცირებული ტრიოს ქვეყნებიდან მოლდოვასა და უკრაინას კანდიდატის სტატუსი, ხოლო საქართველოს ევროპული პერსპექტივა მიანიჭა.

• სამივე ქვეყანას გადაეცა კონკრეტული რეკომენდაციები და მათი შესრულება დაევალათ.
• საქართველოს შემთხვევაში, კანდიდატის სტატუსის მინიჭების წინაპირობა სწორედ 12 რეკომენდაციის შესრულებაა.

არასამთავრობო ორგანიზაციების განცხადებით, ევროინტეგრაციის პროცესი მნიშვნელოვან ინსტრუმენტს წარმოადენს ხელისუფლების ანგარიშვალდებულების გასაზრდელად.

• "მიგვაჩნია, რომ მმართველ ძალას სრული პასუხისმგებლობა აკისრია რეკომენდაციების შესრულებაზე";
• "ერთის მხრივ, საქართველოს მთავრობა აცხადებს, რომ შეასრულებს წევრობის სტატუსის მიღებისთვის წინაპირობად წაყენებულ რეკომენდაციებს";
• "მეორეს მხრივ, კი საზოგადოებაში დიდი მსჯელობის საგანია, საქართველოს მთავრობის მხრიდან მიღებული გადაწყვეტილებები რეალურად მოუპოვებს თუ არა საქართველოს ევროკავშირის კანდიდატი ქვეყნის სტატუსს, რადგან ამ ეტაპზე მთავრობის მხრიდან არ ჩანს სათანადო პოლიტიკური ნება და მზაობა სრულყოფილად შეასრულოს კანდიდატის სტატუსის წინაპირობად წარმოდგენილი 12 რეკომენდაცია", — წერენ ორგანიზაციები.

გარდა ამისა, NGO-ები წერენ, რომ მოცემულ ეტაპზე მნიშვნელოვნად მიაჩნიათ, ევროკომისიის მხრიდან გაიზარდოს რეკომენდაციების შესრულებაზე ზედამხედველობა, რაც მათ შორის ქვეყნის რეალობის გათვალისწინებით, შედეგზე ორიენტირებული რეფორმებისკენ კონკრეტული ნაბიჯების გადადგმასა და დეოლიგარქიზაციის კანონმდებლობის რეალური პრობლემის წინააღმდეგ მიმართვას მოითხოვს.

• "საქართველოს სამოქალაქო საზოგადოების წარმომადგენლები მოგმართავთ თხოვნით, საქართველოსთან დაკავშირებით გაფართოების დაგეგმილი ანგარიშის გარდა, ასევე განიხილოთ შუალედური ანგარიშის 2023 წლის მარტისთვის მომზადების შესაძლებლობა";
• "ამასთან ერთად, რეკომენდაციების შესრულების პროცესში მნიშვნელოვნად მიგვაჩნია შუალედური ნიშნულებისა და ვადების შემოტანა, რაც თავის მხრივ, აამაღლებს ევროკავშირის მიერ წარმოდგენილი რეკომენდაციების შესრულების ხარისხს და ხელისუფლების ანგარიშვალდებულებას", — ვკითხულობთ განცხადებაში.

ხელმომწერი ორგანიზაციებია საერთაშორისო გამჭვირვალობა — საქართველო; ღია საზოგადოების ფონდი; საქართველოს სასამართლოს გუშაგი;

• დემოკრატიის მცველები; ეკონომიკური პოლიტიკის კვლევის ცენტრი; ევროპულ-ქართული ინსტიტუტი;
• სამოქალაქო ინიციატივებისა და ინოვაციების ცენტრი; კავშირი საფარი; ქალები საერთო მომავლისთვის (WECF) - საქართველო;
• მედიის განვითარების ფონდი; ინფორმაციის თავისუფლების განვითარების ინსტიტუტი; ადამიანის უფლებათა ცენტრი.