პრეზიდენტის ადმინისტრაციის ხელმძღვანელმა, გიორგი აბაშიშვილმა On.ge-სთან საუბრისას განაცხადა, რომ ოჯახის სურვილის შემთხვევაში, პრეზიდენტი უმოკლეს ვადაში მიანიჭებს აფგან მუხტარლის ცოლსა და შვილებს საქართველოს მოქალაქეობას:

"პრეზიდენტს მოეწონა პრემიერის იდეა. მიგვაჩნია, რომ ამ რთულ ვითარებაში სწორი იდეაა. პრეზიდენტის დავალებით, ხვალ შევხვდები ჟურნალისტის ოჯახს და მათი სურვილის შემთხვევაში საქართველოს პრეზიდენტი მათ მიანიჭებს მოქალაქეობას".

პრემიერმა გიორგი კვირიკაშვილმა დღეს, საგანგებო განცხადება გამოაქვეყნა, სადაც იგი საქართველოს პრეზიდენტს, სთხოვს შექმნილი ვითარებიდან გამომდინარე, გამონაკლისის სახით, შეძლებისდაგვარად, მოკლე ვადაში მიანიჭოს აფგან მუხტარლის ცოლსა და შვილებს საქართველოს მოქალაქეობა.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.