საქართველოში ჩეხეთის ელჩმა, პეტრ მიკისკამ განაცხადა, რომ 2022 წელს ჩეხეთიდან საქართველოში ექსპორტი თითქმის გაორმაგდა და სარწმუნოდ მიაჩნია, რომ ამ ექსპორტის ნაწილი რუსეთში მიდის.

რატომ არის მნიშვნელოვანი: ელჩის განმარტებით, ჩეხეთი, რომელიც ევროკავშირის პრეზიდენტი ქვეყანაა, თვალს ადევნებს საქართველოში განვითარებულ მოვლენებს.

  • ხოლო თუ დადასტურება, რომ საქართველო რუსეთს სანქციების გვერდის ავლაში ეხმარება, ამას შესაბამისი შედეგები მოჰყვება.
  • "ეს იქნება ერთ-ერეთი კრიტერიუმი, როდესაც შევაფასებთ საქართველოს მზაობას კანდიდატის სტატუსისთვის და არამხოლოდ ის 12 რეკომენდაცია", – განაცხადა ელჩმა.

დეტალები: ეს განცხადება პეტრ მიკისკამ ლიეტუვას საელჩოსა და არასამთავრობო ორგანიზაციის, თავისუფალი რუსეთის ორგანიზებულ ღონისძიებაზე გააკეთა. [ფორმულას თარგმანი]

  • ჩეხეთის ელჩმა ასევე აღნიშნა, რომ ხშირად საქართველო არ იზიარებს ევროკავშირის განცხადებებს ზოგიერთ დიქტატორულ რეჟიმებზე, აფხაზეთისა და სამხრეთ ოსეთის ფაქტორის გათვალისწინებით.
  • "ამ შემთხვევაში, საქართველომ, პრაქტიკულად, უნდა თქვას უარი რაიმე სახის საგარეო პოლიტიკის განვითარებაზე, თუ მუდმივად ოკუპირებული ტერიტორიების აღიარების შიშით იმოქმედებს", — აღნიშნა მან.

პასუხად, ქართული ოცნების თავმჯდომარემ, ირაკლი კობახიძემ თქვა, რომ თუ ელჩმა ასეთი განცხადება მართლაც გააკეთა, ამაზე საქართველოს ხელისუფლებას დიპლომატიური რეაგირება ექნება.

  • "ასეთი განცხადებები თავის დროზე გვაქვს მოსმენილი უკრაინის ხელისუფლების მაღალჩინოსნების მხრიდან და მერე თვითონ მოუწიათ ამის უარყოფა, და ყველამ უარყო აბსოლუტურად ასეთი რამ. და თუ ასეთი განცხადება გაკეთდა ამას სჭირდება რეაგირება, იმიტომ რომ ჩვენ თავის დროზე რეაგირება მოვახდინეთ, და უკრაინელ მაღალჩინოსნებს მოუწიათ უკან წაღება," — დასძინა კობახიძემ.
  • "თუ ასეთი განცხადება გაკეთდება, ყოველთვის ზედ უნდა ერთოს მტკიცებულება, როცა ცოტა უხერხულ თემებზე არის ხოლმე საუბარი", — განაცხადა მამუკა მდინარაძემ.

საქსტატის მონაცემებით, ჩეხეთიდან საქართველოში იმპორტმა გასულ წელს $79 მილიონი შეადგინა.

  • წელს ეს მაჩვენებელი $126 მილიონია და 61%-ით არის გაზრდილი.