მას შემდეგ, რაც Twitter-ის მფლობელი ილონ მასკი გახდა, სხვადასხვა ვარსკვლავმა, მათ შორის შონდა რაიმსმა და ვუპი გოლდბერგმა, ამ პლატფორმის დატოვება დაუყოვნებლივ გადაწყვიტა. როგორც ჩანს, მათ რიგებს ახლა უკვე ცნობილი მსახიობი და კომიკოსი ჯიმ კერიც უერთდება.

"ტვიტერს ვტოვებ, თუმცა მანამდე ამ ანიმაციას გიზიარებთ, რომელიც ჩემს მეგობართან, ჯიმი ჰეივარდთან ერთად შევქმენი,"— დაწერა მსახიობმა. —"ის შეიქმნა ჩემი ნახატის მიხედვით, რომელზეც მოხუცი გიჟი შუქურის მცველია გამოსახული, შტორმში რომ შიშველი დგას, ანგელოზებს ეძახის და თავისი ნათურით ბნელ მოღალატე ღამეში გზის გასაკვლევად მიგვიძღვის. ყველანი ძალიან მიყვარხართ!"

ჯიმ კერი ყოველთვის ტვიტერის აქტიური მომხმარებელი იყო და ხშირად აზიარებდა ამ პლატფორმაზე თავის შემოქმედებას, რომელსაც მეტწილად პოლიტიკური სატირის სახე ჰქონდა. ამ უკანასკნელი ანიმაციის გაზიარების მომენტში მას 18,9 მილიონი გამომწერი ჰყავდა ტვიტერზე, თვითონ კი მხოლოდ შვილის, ჯეინ ერინ კერის, ანგარიში ჰქონდა გამოწერილი.

მას შემდეგ, რაც პლატფორმა ილონ მასკმა შეიძინა, მან დაიფიცა, რომ უფრო ღია სივრცეს შექმნიდა სიტყვის თავისუფლებისთვის აღნიშნულ სოციალურ ქსელში, თუმცა ვარსკვლავები მას რასიზმისა და ანტისემიტიზმის წახალისებაში ადანაშაულებენ ამის ნაცვლად.

ჯიმ კერის განცხადებიდან რამდენიმე საათში ამერიკელმა მომღერალმა Moby-მაც დაწერა, რომ ტვიტერს ტოვებდა და ამ გადაწყვეტილების მიზეზიც გულწრფელად დაასახელა.

"ეს ჩემი უკანასკნელი ტვიტია. წუხელ ილონ მასკმა სრულიად ანტისემიტური მიმი გააზიარა, ასევე CNN-ის ყალბი ამბავი, და იარაღის სურათი თავის მაგიდაზე. ტვიტერი რასიზმის, ანტისემიტიზმის, მისინფორმაციის და აუხსნელი სიძულვილის ორმოდ იქცა და დროა, დავტოვო,"— დაწერა მუსიკოსმა.