საქართველოს პარლამენტის წევრი ნაციონალური მოძრაობიდან, სალომე სამადაშვილი აზერბაიჯანელი ჟურნალისტის, აფგან მუხთარლის საქართველოდან გაუჩინარებაში ხელისუფლების პასუხისმგებლობას ხედავს. ამის შესახებ სამადაშვილმა რამდენიმე წუთის წინ პარლამენტში გამართულ პრესკონფერენციაზე განაცხადა.

"რეალურად დღეს საქართველო ბრუნდება ბნელ წარსულში, როდესაც ქუჩიდან ხალხის გატაცება იყო ჩვეულებრივი მოვლენა და ამაზე პასუხი უნდა აგოს ხელისუფლებამ. დღევანდელი ხელისუფლება ყველა შემთხვევაში პასუხისმგებელია, რაც არ უნდა მომხდარიყო რეალურად, თუ ეს ადამიანი გატაცებულია ჩვენი ქვეყნიდან," - განაცხადა სამადაშვილმა.

აფგან მუხთარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხთარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხთარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხთარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.