ალბათ პოპკულტურის ერთი მოყვარულიც კი არ არსებობს, რომელსაც კანიე ვესტისა და კიმ კარდაშიანის დაშორების ამბავი გამოეპარა. წყვილის დაშორებიდან ცოტა ხანში საზოგადოებამ ჯულია ფოქსი გაიცნო, რომელიც კანიე ვესტს ერთი თვით ხვდებოდა და მასთან ერთად რამდენჯერმე საჯაროდაც გამოჩნდა.

ცოტა ხნის წინ ჯულია ფოქსი ტიკტოკზე იმის გამო გააკრიტიკეს, რომ "ცნობილ მიზოგონსა და ანტისემიტს" (კანიე ვესტს) ხვდებოდა. ჯულიამ კომენტარს ვიდეოთი უპასუხა, რომელშიც აღნიშნა, რომ კანიესთან ურთიერთობა იმისთვის დაიწყო, რათა კიმი ყოფილი ქმრისგან გაეთავისუფლებინა.

ჯულიას თქმით, კარდაშიანები ყოველთვის უყვარდა, რადგან ისინი ჯულიას ხაზის ტანსაცმელს ყიდულობდნენ და თავიანთ მაღაზიებში ყიდდნენ. ჯულიამ თქვა, რომ კანიე დიდი ხნის განმავლობაში სწერდა, თუმცა მასთან ურთიერთობის დაწყებას ყოყმანობდა.

ფოტო: Pascal Le Segretain / Getty Images

"მაგრამ შემდეგ ვიფიქრე: 'იქნებ, კიმი მისგან დავიხსნა. იქნებ, ყურადღება გადავატანინო და ჩემი თავი მოვაწონო. თუ ვინმეს ეს შეუძლია, მე ვარ, რადგან როცა რაღაცას გადავწყვეტ, იმას ვაკეთებ", — გაიხსენა ჯულიამ.

ჯულიას თქმით, ერთად ყოფნის დროს კანიე იმას არ აკეთებდა, რის გამოც ცოტა ხნის წინ კრიტიკის ქარცეცხლში გაეხვა — ეს, განსაკუთრებით, ანტისემიტურ კომენტარებს ეხება. ფოქსის განმარტებით, იმ დროს კანიე სოციალურ ქსელებს აქტიურად არ იყენებდა და არც კიმთან ურთიერთობაზე საუბრობდა. ჯულიას თუ დავიჯერებთ, კანიე მასთან ტანსაცმელზე, განათლებასა და სამომავლო გეგმებზე ლაპარაკობდა.

@juliafox Replying to @ged_baddie ♬ original sound - Julia fox

"როგორც კი ტვიტერზე წერა დაიწყო, თავი დავანებე. მალევე მივხვდი, რომ ის ჩემგან დახმარებას არ მიიღებდა. ილუზიებში ვცხოვრობდი, როცა მეგონა, რომ მისი დახმარება შემეძლო — ახლა ეს ვიცი", — განმარტა ჯულიამ.

ამის მიუხედავად, ჯულიას თქმით, კანიეს, როგორც ხელოვანს, პატივს სცემს და არ უნდა მისდამი დამოკიდებულება მხოლოდ იმ ცუდ მომენტებს დაუკავშიროს, რომელიც ბოლო დროს რეპერსა და ბიზნესმენს ხშირად აქვს.

აღსანიშნავია, რომ ცოტა ხნის წინ ჯულია ფოქსმა განაცხადა, რომ კანიესთან ურთიერთობამ მის კარიერას ავნო და კინოდან შემოთავაზებებს აღარ იღებს.

შეგახსენებთ, რომ კანიე ვესტთან ანტისემიტური კომენტარებისა და ონლაინსივრცეში გამოქვეყნებული სხვადასხვა პოსტების გამო საქმიანი ურთიერთობა ბალენსიაგამ, ადიდასმა და სხვა ბრენდებმა შეწყვიტეს — შედეგად, მისი თქმით, ერთ დღეში $2 მილიარდი დაკარგა. კანიეს ინსტაგრამზე წვდომაც შეეზღუდა, თუმცა ილონ მასკის მიერ ტვიტერის ყიდვის შემდეგ რეპერი ტვიტერზე დაბრუნდა.

ამავე თემაზე: