კანიე ვესტს ინსტაგრამი დაუბლოკეს, რადგან მომღერალმა სოციალური ქსელის წესები ისევ დაარღვია. Meta-ს წარმომადგენლის განცხადებით, ინსტაგრამმა კანიე ვესტის პოსტი უკვე წაშალა და მომღერალს სოციალური ქსელით სარგებლობაც შეეზღუდა.

კანიე ვესტის ინსტაგრამის დაბლოკვის მიზეზი ამჯერად ანტისემიტური პოსტი გახდა. კანიემ რეპერ შონ კობსთან მიმოწერის "სქრინშოტი" გაასაჯაროვა და განაცხადა, რომ რეპერს ებრაელები აკონტროლებენ. "იესო ებრაელია", — ასეთი აღწერა ჰქონდა პოსტს, რომელიც ინსტაგრამმა უკვე წაშალა.

ამერიკის ებრაელთა კომიტეტი (AJC) კანიე ვესტის პოსტს გამოეხმაურა და აღნიშნა, რომ მომღერალი ისეთ ანტისემიტურ სტერეოტიპებზე მიუთითებდა, როგორებიცაა კონტროლი და სიხარბე. "კანიე ვესტმა უნდა გაარკვიოს, თუ როგორ გამოთქვას აზრი ანტისემიტიზმის გარეშე, რადგან გასულ კვირას მომღერალმა ებრაელების მიმართ სიძულვილი გააღვივა", — განაცხადა კომიტეტმა.

კომიტეტის პოსტში ასევე ნახსენები იყო კანიეს ინტერვიუ, რომლის დროსაც მომღერალმა კიდევ ერთი ანტისემიტური განცხადება გააკეთა. კანიემ თეთრი სახლის ყოფილი მრჩეველი ჯარედ კუშნერი, რომელიც წარმოშობით ებრაელია, ფულის მითვისებაში დაადანაშაულა.

ინსტაგრამის დაბლოკვის შემდეგ კანიე ვესტი ტვიტერს დაუბრუნდა და მარკ ცუკერბერგთან გადაღებული ფოტო გამოაქვეყნა, წარწერით "როგორ გამაგდე ინსტაგრამიდან". პოსტს ილონ მასკი გამოეხმაურა და კანიეს ტვიტერზე დაბრუნებას მიესალმა.

ეს პირველი შემთხვევა არ არის, როცა კანიე ვესტს ინტაგრამი დაუბლოკეს. შეგახსენებთ, რომ კანიე ვესტს რასისტული პოსტის გამოქვეყნების გამო ინსტაგრამი 24 საათით დაებლოკა. კანიეს დაბლოკვის მიზეზი The Daily Show-ს წამყვანის ტრევორ ნოას მიმართ რასისტული პოსტი გახდა. ტელეწამყვანი კიმ კარდაშიანისა და კანიე ვესტის განქორწინებას გამოეხმაურა და თქვა, რომ ვესტი ყოფილ ცოლს ავიწროებს.

კანიემ ინსტაგრამზე ტრევორ ნოას გუგლში ძიების შედეგების "სქრინშოტი" დაპოსტა და აღწერაში ტერმინი "Koon baya" ახსენა. ე.წ. "Koon baya" ლექსიკონის მიხედვით, შავკანიანი ინდივიდის, უფრო კონკრეტულად, აფრიკული წარმომავლობის ადამიანის დამამცირებლად მოხსენიებას ნიშნავს.