ვიცეპრემიერმა, ოლგა სტეფანიშინამ უსაფრთხოების საერთაშორისო ფორუმზე განაცხადა, რომ ამ კადრებს შეისწავლიან.

რატომ არის მნიშვნელოვანი: 13 ნოემბერს რუსულ სოციალურ მედიაში გავრცელდა ვიდეო, რომელშიც, მოსკოვის მტკიცებით, უკრაინელი სამხედროების მიერ რუსი ტყვეების დახვრეტაა ასახული.

  • კადრების ავთენტურობა დადგენილი არ არის, არც ის, თუ სად და როდისაა ვიდეო გადაღებული, თუმცა რუსეთმა ის უკვე მონათლა "ომის დანაშაულის" ამსახველ მასალად და საერთაშორისო ორგანიზაციებს გამოძიების თხოვნით მიმართა.
  • მოგვიანებით, საქმის გამოძიების მოწოდებით უკრაინაში გაეროს ადამიანის უფლებათა სადამკვირვებლო მისიაც გამოვიდა.

დეტალები: უკრაინული მხარე კადრების ავთენტურობას უარყოფს, ვარაუდობს, რომ ის დამონტაჟებულია და საქმის შესასწავლად სრულ მზაობას გამოთქვამს.

  • "რა თქმა უნდა, უკრაინის ხელისუფლება გამოიძიებს ამ ვიდეოს“, — თქვა სტეფანიშინამ.
  • მისი განცხადებით, "ძალიან ნაკლებად სავარაუდოა", რომ ამ მოკლე, რედაქტირებულ ფრაგმენტებში ნაჩვენები იყოს ის, რაზეც მოსკოვი საუბრობს.
  • "ყოველი პოტენციური სიკვდილით დასჯილი რუსი ჯარისკაცი არის უკრაინელი, რომლის გაცვლაც შეუძლებელია, ამიტომ აქ ლოგიკა არ არსებობს", — ამბობს ვიცეპრემიერი.

უკრაინის ომბუდსმენის, დიმიტრი ლუბინეცის თქმით, თუ რუსმა სამხედრო ტყვეებმა, როგორც ვიდეოდან ჩანს, განაცხადეს ჩაბარების განზრახვა, მაგრამ შემდეგ ერთმა მათგანმა გახსნა ცეცხლი, მაშინ საპასუხო ცეცხლი არ შეიძლება, ჩაითვალოს სამხედრო დანაშაულად.

  • მისი განცხადებით, ასეთ შემთხვევაში რუსი სამხედროები არ არიან ტყვეები, არამედ იბრძვიან.
  • "უკრაინის ტერიტორიაზე რუსი სამხედრო მოსამსახურეების დაღუპვის ერთადერთი მიზეზი არის რუსეთის ფედერაციის დანაშაულებრივი პოლიტიკა, რომელმაც წამოიწყო გაუმართლებელი გენოციდური ომი უკრაინელი ხალხის წინააღმდეგ", — განაცხადა მან.

რა ჩანს ვიდეოში: კადრებში ნაჩვენებია უკრაინის შეიარაღებული ძალების უნიფორმაში გამოწყობილი კაცი, რომელმაც ცეცხლი გახსნა, ხოლო, სავარაუდოდ, რუსი სამხედრო მოსამსახურეები მიწაზე წვანან. ამის შემდეგ კამერა ძირს ეცემა და ისმის სროლის ხმა.

  • ვიდეოს მეორე, 8-წამიან ფრაგმენტში კი, სავარაუდოდ, რუსი სამხედროების ცხედრებია ნაჩვენები.