ინფორმაცია 2022 წლის III კვარტალში უცხოელ ვიზიტორთა რაოდენობაზე საქსტატმა გაავრცელა.

რატომ არის მნიშვნელოვანი: ომის დაწყების შემდეგ საქართველოში რუსეთის ათასობით მოქალაქე შემოვიდა. ისინი ქვეყანას სხვადასხვა მიზეზით ტოვებენ: სანქციებისთვის თავის ასარიდებლად, პოლიტიკური დევნისგან დასაღწევად და სხვ.

  • რუსეთიდან შემომსვლელთა რიცხვი, განსაკუთრებით, მას შემდეგ გაიზარდა, რაც პუტინმა ქვეყანაში მობილიზაცია გამოაცხადა. ამის გამო საქართველოს საზღვართან რუსების რამდენიმეკილომეტრიანი რიგები იყო.
  • სამოქალაქო საზოგადოება და ოპოზიცია მათ უკონტროლო შემოდინებაში საფრთხეს ხედავს და საზღვრის ჩაკეტვას მოითხოვდა.
  • ოკუპანტი ქვეყნის მოქალაქეები საქართველოში ირეგისტრირებენ ქონებასა და ბიზნესს, იღებენ მოქალაქეობასაც.

დეტალები: სტატისტიკის ეროვნული სამსახურის ცნობით, მესამე კვარტალში ყველაზე მეტი ვიზიტორი — 443 600 ადამიანი, რუსეთიდან შემოვიდა.

  • მეორე ადგილზეა სომხეთი — 15.3%-იანი წილით, ხოლო მესამეზე — თურქეთი, 13.7%-ით.
  • ვიზიტორების უმრავლესობა — 47.3%, 31-50 წლამდე ასაკობრივ კატეგორიას მიეკუთვნებოდა.
  • ყველაზე მეტი ვიზიტი თბილისსა და აჭარაში განხორციელდა, მათი უმრავლესობის (60.3%-ის) მიზანი კი დასვენება, გართობა და რეკრეაცია იყო.
  • ვიზიტებისას გაწეული ხარჯები 4.6 მილიარდ ლარს გაუტოლდა, საშუალო ხარჯმა კი 2 411.4 ლარი შეადგინა.