ამის შესახებ დღეს, 13 ნოემბერს პარტიის კომისიის სხდომის დასრულების შემდეგ გახდა ცნობილი.

რატომ არის მნიშვნელოვანი: 9 ნოემბერს ენმ-ის წევრთა ნაწილმა ყველა დონეზე შიდაპარტიული არჩევნები მოითხოვა. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

  • ენმ-ის თავმჯდომარემ, ნიკა მელიამ თქვა, რომ კოლეგებს ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • აღნიშნა ისიც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.

დეტალები: ენმ-ის წევრის, ბაჩო დოლიძის განცხადებით, არჩევნების ელექტრონულად ჩატარება ძალიან მნიშვნელოვანია, რადგან მონაწილეობის შესაძლებლობა ბევრ ადამიანს ექნება.

  • "გასაგებია, რაღაც სახის ფილტრები იქნება, რომ მანიპულაციები არ იყოს, მაგრამ დარწმუნებული ვარ, ეს პროცესი ძალიან ღია, საჯარო და მასშტაბური იქნება, გამომდინარე იქიდან, რომ მოლოდინები საკმაოდ დიდია", — აღნიშნა მან.

გარდა ამისა, არჩევნების ონლაინრეჟიმში გამართვაზე ისაუბრა პარტიის კიდევ ერთმა წევრმა, ლევან ბეჟაშვილმაც.

  • ამბობს, რომ კომისიაზე საუბარი საარჩევნო კამპანიის შესაძლო ვადებზე, კომისიის ფორმირებისა და კანდიდატის რეგისტრაციის საკითხებზეც იყო, თუმცა დეტალებზე არ უსაუბრია.
  • მისივე თქმით, საუბარია იმაზეც, რომ პოლიტსაბჭოს 3 წევრს კანდიდატის წარდგენის უფლებამოსილება ჰქონდეს.
  • "საორიენტაციოდ ერთი კვირის განმავლობაში პოლიტსაბჭომ უნდა დაამტკიცოს არჩევნების ჩატარების წესი", — ამბობს ის.

ცნობილია, რომ არჩევნებში მონაწილეობა გიორგი ჩალაძესა და გიორგი მუმლაძეს სურთ.