ირანელი კაცი, რომელიც პარიზის შარლ დე გოლის აეროპორტში 18 წლის განმავლობაში ცხოვრობდა, 77 წლის ასაკში ბუნებრივი სიკვდილით გარდაიცვალა.

მერჰან ქარიმი ნასერი ევროპაში თავდაპირველად 1988 წელს, დედის მოსაძებნად ჩავიდა. საბუთების არქონის გამო მას გაერთიანებული სამეფოს, ნიდერლანდებისა და გერმანიის დატოვება მოუხდა, რის შემდეგაც რამდენიმე წლის განმავლობაში ბელგიაში ცხოვრობდა. ამის შემდეგ იგი საფრანგეთში ჩავიდა და აეროპორტის ერთ-ერთ ტერმინალში დასახლდა, რადგან ქვეყანაში შესვლის ნება არ დართეს.

აეროპორტის სკამზე განთავსებულ კაცს თავისი ნივთები ურიკებზე დაეხვავებინა, თავად დროს წიგნებისა და გაზეთების კითხვაში ატარებდა, ზოგჯერ კი თავის ცხოვრებაზე წერდა კიდეც.

1999 წელს ნასერის ლტოლვილის სტატუსიც მიანიჭეს, თუმცა, 2006 წლამდე მაინც აეროპორტში რჩებოდა, სანამ შეუძლოდ გახდებოდა და საავადმყოფოში გადაიყვანდნენ. მოგვიანებით, მან მცირე ხნით იცხოვრა სასტუმრო სახლშიც.

ნასერის, საბოლოოდ, საფრანგეთში ცხოვრების უფლებაც მიეცა, მაგრამ რამდენიმე კვირის წინ აეროპორტს ისევ დაუბრუნდა საცხოვრებლად და იქ გარდაცვალებამდე დარჩა.

მერჰან ქარიმი ნასერის ამბის მიხედვით სტივენ სპილბერგმა ფილმი ტერმინალი გადაიღო, რომელიც ეკრანებზე 2004 წელს გამოვიდა. ფილმში მთავარ როლს ტომ ჰენკსი ასრულებს. კინოსურათის წარმატების შემდეგ კაცი იმდენად პოპულარული გახდა, რომ უკვე "სერ ალფრედად" წოდებული დღეში რამდენიმეჯერ აძლევდა ინტერვიუს სხვადასხვა მედიას.