ჩეჩნეთის პრეზიდენტი, რამზან კადიროვი საფრანგეთისა და გერმანიის ლიდერებს, ემანუელ მაკრონსა და ანგელა მერკელს ჩეჩნეთში ეპატიჟება. ამის შესახებ ინფორმაციას რუსული მედია დოჟდი ავრცელებს.

"არ არის საჭირო რუსული მედია საშუალებების ცილისწამებაში დადანაშაულება, მაშინ, როცა თვითონ არასწორი ინფორმაციით ხელმძღვანელობ. საფრანგეთის პრეზიდენტ მაკრონს, მერკელთან ერთად, ჭეშმარიტების საძიებლად შეუძლია ჩამოვიდეს ჩეჩნეთში. კარი ღიაა," - წერს კადიროვი ტელეგრამში.

გუშინ, 29 მაისს, საფრანგეთის ახლადარჩეულმა პრეზიდენტმა პუტინთან შეხვედრისას, ჩეჩნეთში გეების უფლებების საკითხი დააყენა და თქვა, რომ ის მუდმივად ყურადღებით აკვირდება ამ თემას. ერთობლივი პრესკონფერენციის დროს, მაკრონმა ისაუბრა რუსულ მედიასაშუალებებზეც და მათ პროპაგანდისტული უწოდა.

მანამდე, ჩეჩნეთში სიტუაციის დარეგულირება სთხოვა პუტინს გერმანიის კანცლერმა, ანგელა მერკელმაც.

აპრილში, რუსულმა გაზეთმა, ნოვაია გაზეტამ ჩეჩნეთის ხელისუფლების მიერ გეების მასობრივი დაკავებებისა და მკვლელობების შესახებ ინფორმაცია გამოაქვეყნა. ლგბტ თემის წევრებმა მათ მიმართ მიმდინარე დევნაზე CNN-თანაც ისაუბრეს. ლგბტ ადამიანების მიმართ ჩადენილი დანაშაულის გამოძიებას მოითხოვს გაერო.