გაერთიანებული ერების ადამიანის უფლებების დაცვის წარმომადგენლები ოფიციალური პირებისგან ჩეჩნეთში ლგბტ ადამიანების დაკავების და მათ მიმართ არსებული მდგომარეობის გამოძიებას მოითხოვენ. ინფორმაციას CNN ავრცელებს.

"სასიცოცხლოდ მნიშვნელოვანია იმ ცნობების გამოძიება, რომლის მიხედვითაც გეი თუ ბისექსუალ ადამიანებს ჩეჩნეთში უკანონოდ აკავებენ, ცემენ, აწამებენ და კლავენ" - აცხადებს გაერო.

მარტიდან უამრავი ცნობა ვრცელდება ჩეჩნეთში ლგბტ ადამიანების გაუჩინარების შესახებ. რუსეთში არსებული ოპოზიციური გამოცემებისა და ადამიანის უფლებების დამცველების განცხადებით, მათი ნაწილი დაკავებულია, თუმცა არიან ისინიც, ვისი ბედიც გაურკვეველია,\

რუსული მედიაგამოცემა ნოვაია გაზეტა წერს, რომ გასულ კვირას რამდენიმე კაცი "არატრადიციული სექსუალური ორიენტაციის, ან მასთან დაკავშირებული ეჭვების ბრალდებით" დააკავეს. გამოცემა აცხადებს, რომ ბოლო 2 კვირის განმავლობაში ამ ბრალდებით ჩეჩნეთში 100-ზე მეტი ჰომოსექსუალი დააკავეს და მათ ასევე აქვთ მოკლულთა სახელები.

CNN რუსულ წყაროზე დაყრდნობით აცხადებს, რომ დაკავებულებს შორის არიან დალაქები, კულტურის წარმომადგენლები და რელიგიური ფიგურები.