საქართველოს საპარლამენტო უმრავლესობის დეპუტატმა, ზაზა გაბუნიამ და მისმა 20-მდე კოლეგამ სასოფლო-სამეურნეო დანიშნულების მიწის გასხვისების შესახებ კანონპროექტი შეიმუშავეს, რომლის მიხედვითაც, საქართველოს მოქალაქეობის არ მქონე პირებს მიწის ყიდვა აღარ შეეძლებათ. ამის შესახებ On.ge-ს გაბუნიამ განუცხადა. კანონპროექტი პარლამენტში ინიცირებულია.

გაბუნიას თქმით, უცხოეთის მოქალაქეს საქართველოში მიწის ყიდვა მხოლოდ კომპანიის დახმარებით შეეძლება, რომლის 50 პროცენტზე მეტი წილის მფლობელი საქართველოს მოქალაქე უნდა იყოს. დეპუტატი ამბობს, რომ კანონპროექტში არ არის გათვალისწინებული უცხოელების საკუთრებაში არსებული მიწის ნაკვეთების გასხვისების ვალდებულება.

"ჩვენ კანონპროექტში არ ჩავწერეთ, რომ [სხვა ქვეყნის მოქალაქეს] მიწა უნდა ჩამოერთვას ან გაყიდოს. მაგრამ ისიც არ წერია, რომ შეუნარჩუნდეს, ის ქონება, რაც აქვს," - ამბობს გაბუნია და დასძენს, რომ მისი აზრით, ვისაც მიწა კანონპროექტის ამოქმედებამდე ექნება მიღებული, მას ქონება არ უნდა ჩამოერთვას, ან რეალიზაციის ვალდებულება არ უნდა დაეკისროს.

ამავე დოკუმენტში არ არის განსაზღვრული, როგორ უნდა გაკონტროლდეს საქართველოსა და სხვა ქვეყნის მოქალაქეების მიერ კომპანიებში წილების ფლობის საკითხი.

"ის რისკი, რომ უცხო ქვეყნის მოქალაქე ჩამოვა და მისთვის ძალიან სწრაფად და იაფად იყიდის მიწას, ეს რისკი კანონპროექტით გამოირიცხება. ეს იყო მიზანი სამუშაო ჯგუფის," - ამბობს გაბუნია, რომელიც ფიქრობს, რომ ამ შეზღუდვით საქართველოში არსებულ მიწები ეკონომიკურ მიმზიდველობას არ დაკარგავს.

გაბუნია ამბობს, რომ სახელმწიფოს უნდა ჰქონდეს ბერკეტი, რომლის დახმარებითაც (მიწის განკარგვით) სახელმწიფო და მოქალაქეები მეტ სარგებელს მიიღებენ.

საქართველოს მოქმედი კანონმდებლობით, უცხო ქვეყნის მოქალაქეებს საქართველოში სასოფლო-სამეურნეო მიწის ყიდვაზე შეზღუდვები არ აქვთ. თუმცა, კონსტიტუციის პროექტით, საქართველოს კონსტიტუციაში მიწასთან დაკავშირებით ჩანაწერი ჩნდება, რომლითაც "მიწა არის უნიკალური რესურსი", რომლის გასხვისების წესების განსაზღვრაც კანონმდებლობაში იგეგმება.