საქართველოს ახალგაზრდა იურისტთა ასოციაციამ და საერთაშორისო გამჭვირვალობა - საქართველომ იუსტიციის უმაღლესი საბჭოს მონიტორინგის ანგარიში, პროტესტის ნიშნად, პრესკონფერენციაზე არ წარადგინეს. თუმცა, მათ ანგარიში ვებგვერდზე გამოაქვეყნეს. ორგანიზაციებში მიიჩნევენ, რომ სასამართლო სისტემაში სერიოზული კრიზისია და სასამართლო რეფორმა სწორ გზაზე არ დგას.

"ჩვენ არ ვაპირებთ, რომ შევქმნათ სურათი, თითქოს პროგრესი არის, მაგრამ გარკვეული ხარვეზები რჩება, იმიტომ, რომ ეს ასე არ არის და არ ვაპირებთ გავაგრძელოთ მოსმენა იმ მესიჯის, რომელსაც უკვე არაერთი თვეა და წელია ვისმენთ ხელისუფლებისგან, რომ სასამართლო სისტემა ერთ ღამეში ვერ შეიცვლება, რაც ჩვენც ძალიან კარგად ვიცით," - განაცხადა ნაცვლიშვილმა.

ნაცვლიშვილის თქმით, სასამართლო რეფორმის შესახებ პასუხისმგებლობა საქართველოს პარლამენტმა უნდა აიღოს, რომელიც სასამართლო რეფორმებს ახორციელებს. მან აღნიშნა, რომ რეფორმების მიუხედავად, სასამართლო სისტემაში არაფერი შეცვლილა.

"ადამიანები, რომლებსაც არ გააჩნიათ მინიმალური ნდობაც კი საზოგადოების მხრიდან მათი არაკომპეტენტურობის და არაკეთილსინდისიერების გამო, კვლავ ბრუნდებიან სასამართლო სისტემაში. არამარტო ბრუნდებიან სასამართლო სისტემაში, იკავებენ მაღალ თანამდებობებს და კვლავ ხდება ძალაუფლების ერთი პატარა პირის ხელში, რომელიც სრულიად თვითნებურ გადაწყვეტილებებს იღებს," - დასძინა ნაცვლიშვილმა.

მსგავსი საკითხებზე ისაუბრა საერთაშორისო გამჭვირვალობა -საქართველოს აღმასრულებელმა დირექტორმა, ეკა გიგაურმაც. მისი თქმით, მათ ანგარიშებში კვლავ ის მოსამართლეების ხვდებიან, რომლების შესახებაც მანამდეც საუბრობდნენ.

"რომლებიც იყვნენ ისეთი მოსამართლეები, რომლებიც თვალწინ ხედავდნენ ნაწამებ ადამიანს კითხვას არ უსვამდნენ, ვინმემ რამე პრობლემა ხო არ შეუქმნაო. ესენი არიან ის მოსამართლეები, რომლებიც რჩებიან სისტემაში," - აღნიშნა გიგაურმა.