საქართველოს პრეზიდენტის საპარლამენტო მდივანი, ანა დოლიძე, მიიჩნევს, რომ იუსტიციის უმაღლესი საბჭოს მიერ სააპელაციო სასამართლოს თავმჯდომარედ მიხეილ ჩინჩალაძის დანიშვნა გაუმჭვივრალე პროცესის შედეგია. ამის შესახებ დოლიძემ 29 მაისს განაცხადა:

"სასამართლო სისტემასთან დაკავშირებულ კანონზე ვეტოში პრეზიდენტი აღნიშნავდა, რომ აუცილებელი იყო მოსამართლეებს თვითონ აერჩიათ საკუთარი თავმჯდომარეები, რადგან, ერთი კონკრეტული ორგანოს, იუსტიციის საბჭოს, ხელში არ ყოფილიყო მთელი სასამართლო ხელისუფლების გაკონტროლების საშუალება. სწორედ ამიტომ, თვითონ მოსამართლეებს უნდა მიეღოთ გადაწყვეტილება ვინ იქნებოდა მათი ლიდერი.

როცა სისტემურად არასწორადაა შექმნილი ეს პროცესი და არ არის გამჭვირვალე, არ არის დახვეწილი და რაც მთვარია კონცენტრირებულია ერთი, ძალიან მცირე, დახურული ჯგუფის ხელში, ჩვენ ვიღებთ ასეთ შედეგებს".

დოლიძის შეფასებით, სისტემა, რომელიც დღეს მუშაობს, აძლევს საშუალებას რამდენიმე ადამიანს, შეითავსოს უამრავი თანამდებობა, გადაწყვეტილება მიიღოს საზოგადოების მონაწილეობის, ჩართულობის გარეშე, ცენტრიდან დაუნიშნოს თავმჯდომარე ყველა სასამართლოს.

"ამაზე ჩვენ ვსაუბრობდით გაზაფხულზე და სანამ სისტემურად არ გამოსწორდება ეს პრობლემები, ბუნებრივია რამდენიმე ადამიანს, რომელიც დომინირებს საბჭოში მიეცემა საშუალება საკუთარი სურვილისამებრ წარმართოს პროცესები“, - თქვა ანა დოლიძემ.

იუსტიციის უმაღლესმა საბჭომ მიხეილ ჩინჩალაძე სააპელაციო სასამართლოს თავმჯდომარის პოსტზე 29 მაისს დანიშნა.