არჩევნებში ათობით პარტია მონაწილეობს, თუმცა წინასწარი შედეგებით, გამარჯვებასთან ყველაზე ახლოს ყოფილი პრემიერმინისტრის, ბენიამინ ნეთანიაჰუს პარტია ლიკუდი და მისი ულტრამემარჯვენე მოკავშირეები არიან.

რატომ არის მნიშვნელოვანი: ბენიამინ ნეთანიაჰუ 2021 წლის ივნისში პრემიერმინისტრობიდან 12-წლიანი მმართველობის შემდეგ გადააყენეს.

  • ამავე პერიოდში დაიშალა რვა პარტიისგან შემდგარი სამთავრობო კოალიცია, რომელმაც მხოლოდ ერთი წელი იარსება.
  • მაშინ მთავრობას სათავეში საგარეო საქმეთა მინისტრი ლაპიდი ჩაუდგა, რომელიც ახლა მოქმედი პრემიერმინისტრია.
  • ბოლო, თითქმის ოთხ წელიწადში, ეს ისრაელში ჩატარებული უკვე მეხუთე საპარლამენტო არჩევნებია.

ნეთანიაჰუ ისრაელის პოლიტიკურ ცხოვრებაში 1988 წლიდან ჩაერთო. იმავე წელს ადგილი პარლამენტში მოიპოვა და საგარეო საქმეთა მინისტრის მოადგილე გახდა.

  • ისრაელის მთავრობას კი 1996-1999 და 2009-2021 წლებში ხელმძღვანელობდა.
  • 2021-ში წასვლისას მან პირობა დადო, რომ აუცილებლად დაბრუნდებოდა და სავარაუდოდ, ასეც მოხდება.
  • ამ შემთხვევაში ის მეექვსედ დაიკავებს თანამდებობას და მოხსნის რეკორდს ისრაელის სხვა პრემიერმინისტრებთან შედარებით.

საპარლამენტო არჩევნებში ლიკუდის ძირითად მოწინააღმდეგედ ცენტრისტული პარტია ეშ ატიდი მიიჩნევა, რომელსაც მოქმედი პრემიერი იაირ ლაპიდი ხელმძღვანელობს.

  • 1999 წლის შემდეგ ამ არჩევნებზე ყველაზე მაღალი აქტივობაა — საბოლოო შედეგები ხვალ გახდება ცნობილი.
  • "თუ შედეგები მნიშვნელოვნად არ შეიცვალა, ეს იქნება განსაცვიფრებელი დაბრუნება ნეთანიაჰუსთვის, რომელსაც ამჟამად სასამართლოში სამ კორუფციულ საქმეზე ასამართლებენ და დაასრულებს ოთხწლიან პოლიტიკურ ჩიხს, რამაც ქვეყანა გადაიყვანა არჩევნების სერიაში", — წერს The times of Israel.
  • თუმცა კრიტიკოსები ამბობენ, რომ მოსალოდნელია ამან გამოიწვიოს ულტრანაციონალისტების ძალაუფლების გაძლიერება, რომლებმაც შეიძლება ჩამოართვან არაბ მოქალაქეებს უფლებები, შეურაცხყოფა მიაყენონ უზენაეს სასამართლოს და მიიღონ კანონმდებლობა, რომელიც აღმოფხვრის ნეთანიაჰუს სამართლებრივ პრობლემებს.
  • მაშინაც კი, თუ ნეთანიაჰუ და მისი მოკავშირეები მოიგებენ, კოალიციური მთავრობის ჩამოყალიბებას, შესაძლოა, კვირები დასჭირდეს.