მეცნიერებმა მიაკვლიეს მეთოდს, რომელიც ხსნის, თუ როგორ იცვლის ლეიკემიის ზოგი ტიპი გარეგნობასა და იდენტობას მკურნალობის თავიდან ასარიდებლად.

სისხლის სპეციფიკური სიმსივნეები

კვლევის ფარგლებში, ბირმინგემის უნივერსიტეტის, ნიუკასლის უნივერსიტეტისა და Princess Máxima Center-ის მკვლევრებმა სისხლის სიმსივნით დაავადებული ბავშვების მკურნალობის დინამიკა შეისწავლეს.

კვლევა ჟურნალ Blood-ში გამოქვეყნდა.

გასული 50 წლის განმავლობაში სისხლის სიმსივნეების კვლევისა და მკურნალობის კუთხით მედიცინა ძალიან წინ წავიდა, ბავშვებში მწვავე ლიმფობლასტური ლეიკემიის (ALL) განკურნების მაჩვენებელმა 90%-ს მიაღწია.

მიუხედავად ამისა, სისხლის სიმსივნის მკურნალობისას ექიმებმა შეამჩნიეს, რომ ეს მიღებული მეთოდები დაავადების ზოგ ფორმაზე გავლენას არ ახდენს. მსგავსი პაციენტებისათვის ექიმები იმუნოთერაპიის ახალ მეთოდებზე მუშაობენ, როგორიც, მაგალითად CAR T უჯრედზე დაფუძნებული თერაპიებია.

ასევე იხილეთ: ახალი იმუნური უჯრედი, შესაძლოა, "მრავალი ტიპის კიბოს განკურნების" იარაღად იქცეს — კვლევა

ლეიკემიის ზოგ ფორმას პროცედურის სამიზნე უჯრედული ცილების წარმოების შეჩერების გზით იმუნოთერაპიის არიდება შეუძლია.

სხვა ლეიკემიები იცვლებიან და სისხლის სიმსივნის აბსოლუტურად სხვა ტიპები ხდებიან, რაც, ბუნებრივია, თერაპიას უშედეგოდ აქცევს. მკვლევრებმა აღმოაჩინეს სპეციფიკური MLL გენი, რომელიც პაციენტებში სიმსივნის შემობრუნების რისკებს ზრდის.

როგორ იცვლებიან "ქამელეონი სიმსივნეები"?

ჯგუფმა "ქამელეონი სიმსივნეების" მიზეზი აღმოაჩინა. მათ ნათელი მოჰფინეს მექანიზმს, რომელიც ხსნის, თუ როგორ ახერხებს დაავადება იდენტობისა და გარეგნობის ცვლას.

მკვლევრებმა შეისწავლეს მწვავე ლიმფობლასტური ლეიკემიით დაავადებული 12 ბავშვისა და მოზრდილი პიროვნების დნმ, რომელთა სიმსივნეც MLL გენში ცვლილებებს აჩვენებდა.

"დიდი ხანია ცნობილია, რომ ამ ქრომოსომული განლაგების მატარებელ ALL უჯრედებს შეუძლიათ განიცადონ რეციდივი და იქცნენ მწვავე მიელოიდურ ლეიკემიად (AML). ამ შეცვლილი MLL/AF4 ლეიკემიების შესწავლისას ჩვენ ვაჩვენეთ, რომ სისხლის უჯრედებში ცვლილება შეიძლება მოხდეს ძვლის ტვინში ფორმირების სხვადასხვა ეტაპზე", — განაცხადა კვლევის თანაავტორმა, ნიუკასლის უნივერსიტეტის საპატიო კონსულტანტმა, პროფესორმა სიმონ ბომკენმა.

ბომკენმა განაცხადა ისიც, რომ ლევკემიის ტიპის შეცვლა, შესაძლოა, ქიმიოთერაპიით გამოწვეულ გენეტიკური ცვლილებებთანაც იყოს დაკავშირებული, რადგან ეს უბიძგებს ლეიკემიის ზოგ ტიპს, რომ "გადაპროგრამდნენ" და შეიცვალონ იდენტობა.

"ქამელეონი სიმსივნეების" მკურნალობის სირთულე

თუ ALL უჯრედები იცვლიან იდენტობას, ბუნებრივია, მათი მკურნალობა ბევრად რთულდება. კვლევის კიდევ ერთი თანაავტორის, დოქტორი ოლაფ ჰაიდენრაიხის თქმით, ახალი კვლევა დაეხმარება ექიმებს, რომ აღმოაჩინონ ბავშვები, რომლებიც სიმსივნის შემობრუნების უფრო მაღალი რისკის ქვეშ არიან და შესაბამის ზომებს მიმართონ. მწვავე ლიმფობლასტური ლეიკემიით ყოველწლიურად მსოფლიოში ასობით ბავშვი ავადდება.

ასევე იხილეთ: რატომ ემართებათ ბავშვებს ლეიკემია — 30-წლიანი კვლევის შედეგები

მკვლევრებს სურთ, გამოიყენონ ეს კვლევა, რათა აღკვეთონ პაციენტებში სისხლის სიმსივნის ტიპის ცვლილება და, შესაბამისად, მკურნალობა ბევრად ეფექტიანი გახადონ.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.