ომის კვლევის ინსტიტუტის ინფორმაციით, უკრაინა წარმატებით აგრძელებს კონტრშეტევას ლუგანსკისა და დონეცკის ოლქებში. რუსი ძალები სარეზერვო და თავდაცვით პოზიციებს ამყარებენ და აგრძელებენ სამხედრო პერსონალის მობილიზებას რეკრუიტირების პოლიტიკის დარღვევით.

რატომ არის მნიშვნელოვანი: უკრაინის მიერ კონტრშეტევაზე გადასვლამ ომის მიმდინარეობა შეცვალა.

• ბოლო კვირების განმავლობაში, რუსული ძალები უკან იხევენ და სავარაუდოდ ხერსონში, მდინარე დნეპრის სანაპიროებზე ხაფანგში აღმოჩნდნენ.
• ომის კვლევის ინსტიტუტის ცნობით, უკრაინა წლის ბოლომდე შეძლებს დაიბრუნოს ხერსონის ზემო ნაწილი.
• რუსეთის ფედერაცია ეძებს საბრძოლო დანაკარგების შევსების დამატებით წყაროებს.

ბოლო ცნობები ფრონტიდან: 25 ოქტომბერს უკრაინის თავდაცვის ძალებმა თავდასხმები მოიგერიეს 9 დასახლებულ პუნქტში.

• ოკუპანტებმა 5 სარაკეტო და 30 საჰაერო თავდასხმა განახორციელეს, ასევე 100-ზე მეტი შეტევა მრავალჯერადი სარაკეტო სისტემებიდან.
• 24 ოქტომბრის მდგომარეობით, უკრაინელებმა მოახერხეს მტრის უკან დახევა ლუგანსკის ოლქის სამ და დონეცკის ოლქის ერთი დასახლებიდან.
• ოკუპანტებმა დონეცკის ოლქში წარუმატებელი სახმელეთო შეტევები განახორციელეს, უკრაინელ დამცველებს ცეცხლი გაუხსნეს ევდეევსკის და ბახმუტის მიმართულებით.
• უკრაინელმა პარტიზანებმა რუსების მიერ ოკუპირებული ზაპოროჟიეს ოლქში საოკუპაციო ხელმძღვანელზე თავდასხმა განახორციელეს.
• რუსებმა გრადების ცეცხლით დაფარეს ჩერვონოგრიგორიევსკის თემი, თუმცა ხალხი არ დაშავებულა — თავდასხმის შედეგად ელექტროენერგიის გარეშე დარჩა 600-ზე მეტი ოჯახი.

ხერსონი: უკრაინელმა სამხედროებმა უკვე შეძლეს 90-ზე მეტი დასახლების დეოკუპაცია ამ რეგიონში.

• უკრაინის სამხრეთით შეიარაღებული ძალების წინსვლა წვიმიანი ამინდის გამო შენელდა, თუმცა უკრაინელი დამცველები ტერიტორიის გათავისუფლებას აგრძელებენ.
• "ჩვენ ვაკონტროლებთ ხერსონში დნეპრზე გამავალ ყველა ხიდს ამერიკული სისტემების გამოყენებით. შესაბამისად რუსები ვერ შეძლებენ გაქცევას, როგორც ეს გააკეთეს ხარკოვის მიმართულებით, მაგალითად იზიუმში და სხვა ქალაქებში", — განაცხადა რეზნიკოვმა.
• რეზნიკოვი მიიჩნევს, ოკუპანტებისთვის ხერსონში დარჩენა და უკრაინის შეიარაღებულ ძალებთან ქუჩის ბრძოლების გამართვა სიცოცხლისთვის საშიშია, მათ არ რჩებათ გაქცევის გზებიც.
• რუსი ოფიციალური პირები აგრძელებენ იმის მტკიცებას, რომ ხერსონის ევაკუაცია უფრო დიდი განსახლების პროგრამის ნაწილია.

ამასთანავე: არსებობს სარაკეტო თავდასხმის და უპილოტო საფრენი აპარატების გამოყენების საფრთხე უკრაინის ტერიტორიაზე.

• ბელარუსი აგრძელებს რუსეთის შეიარაღებული აგრესიის მხარდაჭერას უკრაინის წინააღმდეგ.
• რუსეთი უკრაინის წინააღმდეგ ომისთვის იწვევს ავღანეთის ეროვნული არმიის ელიტარული კომანდოს კორპუსის წევრებს, რომლებიც ქვეყანაში დარჩნენ, როცა მმართველობის სადავეები ხელში თალიბებმა აიღეს.
• დაშავების გამო დათხოვნილ სამხედროებს რუსები ბუღალტერიის კურსებს და გადამზადებას სთავაზობენ, რაც ნაკლებ ფიზიკურ აქტივობასთანაა დაკავშირებული.