ომის შემსწავლელი ინსტიტუტის 19 სექტემბრის ანგარიშის მიხედვით, რუსეთის მარიონეტული ძალები რუსეთის მიერ ლუგანსკისა და დონეცკის ოლქების დაუყოვნებლივ ანექსირებაზე საუბრობენ.

რატომ არის მნიშვნელოვანი: ISW-ის განცხადებით, მსგავსი დისკუსია აჩვენებს, რომ უკრაინის მიმდინარე კონტრშეტევა პანიკაში აგდებს როგორც კრემლს, ასევე, მის მარიონეტულ ძალებს.

  • მათი თქმით, დონეცკისა და ლუგანსკის ე.წ. სახალხო რესპუბლიკების მარიონეტული ორგანოები მათ ხელმძღვანელობას მოუწოდებენ, რომ რეგიონებში სასწრაფოდ ჩაატარონ ე.წ. რეფერენდუმები;
  • 11 სექტემბერს ცნობილი გახდა, რომ კრემლმა უკრაინის ოკუპირებულ ტერიტორიებზე ე.წ. რეფერენდუმები გადადო, ამის მიზეზად Meduza-ს წყაროებმა უკრაინის წარმატებული კონტრშეტევა დაასახელეს.

დეტალები: ანგარიშში აღნიშნულია, რომ უკრაინის კონტრშეტევა რუსეთის იმ ქვედანაყოფების საბრძოლო სულისკვეთებას ამცირებს, რომლებიც უკრაინაში შეჭრამდე "ელიტურებად" ითვლებოდნენ.

  • ISW-ის ცნობითვე, უკრაინის შეიარაღებული ძალები, დიდი ალბათობით, მდინარე ოსკილისა და ლიმანი-იამპილი-ბილოჰორივკას გასწვრივ ლოკალიზებულ და ლიმიტირებულ კონტრშეტევას აგრძელებენ;
  • მათივე თქმით, უკრაინა აგრძელებს რუსეთის სამხედრო, სატრანსპორტო და ლოგისტიკურ ობიექტებზე დარტყმას ხერსონის რეგიონში.