უკრაინის შეიარაღებული ძალების გენერალური შტაბი აცხადებს, რომ რუსი სამხედროები დროებით ოკუპირებულ ხერსონს ქუჩის ბრძოლისთვის ამზადებენ.

რატომ არის მნიშვნელოვანი: კონტრშეტევის შედეგად, უკრაინელებმა 21 ოქტომბრის მდგომარეობით, ხერსონის რეგიონში 88 დასახლებული პუნქტი გაათავისუფლეს.

  • როგორც Unian წერს, ქვეყნის სამხრეთით ჩვენი უკრაინელი სამხედროები აქტიურად ანადგურებენ მტერს და მის მნიშვნელოვან ობიექტებს, ასევე აღჭურვილობასა და იარაღს.

უკრაინის გენშტაბი: აცხადებენ, რომ მოსახლეობის მნიშვნელოვანმა ნაწილმა დატოვა ქალაქი ხერსონი.

  • "ქალაქში დარჩენილი რუსი დამპყრობლები სამოქალაქო ტანსაცმელს იცვამენ და მიტოვებულ შენობაში გადადიან. მტერი ხერსონს ქუჩის ბრძოლებისთვის ამზადებს".

ISW: ომის კვლევის ინსტიტუტის ანგარიშის მიხედვით, ოკუპანტებმა დასავლეთ ხერსონიდან უკან დახევა დაიწყეს.

  • "სავარაუდოდ, აპირებენ გააგრძელონ ეს გაყვანა მომდევნო რამდენიმე კვირის განმავლობაში, მაგრამ შეიძლება გაუჭირდეთ, თუ უკრაინა შეტევას გადაწყვეტს".

ბრიტანეთის დაზვერვა: მათი ინფორმაციით, რუსები ხერსონში დნეპრზე გადასასვლელებს ამაგრებენ.

  • მათი ცნობით, უკვე დაასრულეს ხერსონში, დაზიანებული ანტონოვსკის ხიდის სიახლოვეს, ბარჟის ხიდის მშენებელობა.
  • წერენ, რომ მიუხედავად იმისა რომ ბარჟის მძიმე ხიდები ჯერ კიდევ საბჭოთა ეპოქაში გამოიყენებოდა, რუსეთის ძალებს, სავარაუდოდ, ათწლეულების განმავლობაში, პირველად დასჭირდათ ამ ტიპის ხიდებით სარგებლობა.

არქივიდან: 19 ოქტომბერს ვლადიმერ პუტინმა ხელი მოაწერა კანონს უკრაინის 4 "ანექსირებულ" რეგიონში, მათ შორის ხერსონში საომარი მდგომარეობის გამოცხადებაზე, რაც მაშინვე არალეგალურად ცნო საერთაშორისო საზოგადოებამ და უკრაინამ.

  • ცნობილი გახდა, რომ რუსეთი ხერსონის ოლქიდან მოსახლეობის მასობრივ "ევაკუაციას" იწყებს.
  • 2 000 მობილიზებული რუსი ხერსონის ოლქში ჩაიყვანეს — უკრაინის გენერალური შტაბის განცხადებით, ახალმობილიზებული რუსები ანექსირებულად გამოცხადებულ ხერსონის ოლქში დანაკარგების შესავსებად და ფრონტის ხაზზე ქვედანაყოფების გასაძლიერებლად ჩაიყვანეს.