დღეიდან 29 მაისის ჩათვლით, თბილისი ნატოს საპარლამენტო ასამბლეის საგაზაფხულო სესიას უმასპინძლებს. 26 მაისს, 11 საათზე საქართველოს პარლამენტის სასახლეში პარლამენტის თავმჯდომარე, ირაკლი კობახიძე, ნატოს საპარლამენტო ასამბლეის პრეზიდენტი, პაოლო ალი, ნატოს საპარლამენტო ასამბლეის გენერალური მდივანი, დევიდ ჰობსი და საქართველოს პარლამენტის თავდაცვისა და უშიშროების კომიტეტის თავმჯდომარე და ნატოს საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელი ირაკლი სესიაშვილი ქართული და უცხოური მედიისთვის ერთობლივ პრესკონფერენციას გამართავენ.

ნატოს საპარლამენტო ასამბლეის პრეზიდენტმა, პაოლო ალიმ საქართველოში ჩამოსვლისას ჟურნალისტებთან განაცხადა, რომ ისინი საქართველოს ძალიან მნიშვნელოვან პარტნიორად მიიჩნევენ რეგიონში:

"ვიზიტის მიზანია იმის დემონსტრირება, რომ ნატოს საპარლამენტო ასამბლეა ძალიან ახლოსაა საქართველოსთან. ჩვენ ვაფასებთ იმას, რაც ამ ქვეყანამ გასულ წლებში გააკეთა. მან გააუმჯობესა დემოკრატიზაციის პროცესი. მას ასევე დიდი წვლილი შეაქვს ნატოში, კონკრეტულად ავღანეთის მისიაში. რაც შეეხება რეზოლუციას, ჩვენ ისევ ვმუშაობთ მის ტექსტზე და ის იქნება საქართველოს მხარდამჭერი".

ოთხ დღიანი სესიის ფარგლებში, ორმხრივი და მრავალმხრივი შეხვედრები, საკომიტეტო სხდომები და პრესკონფერენციებია დაგეგმილი.

29 მაისს ასამბლეის პლენარული სხდომა გაიმართება სასტუმროში ჰუალინგ თბილისში. სესიის მონაწილეებს მისასალმებელი სიტყვით მიმართავენ, საქართველოს პარლამენტის თავმჯდომარე ირაკლი კობახიძე, პრეზიდენტი გიორგი მარგველაშვილი და პრემიერ-მინისტრი გიორგი კვირიკაშვილი.

პლენარული სხდომის დასასრულს ნატოს საპარლამენტო ასამბლეის წევრები საქართველოს ევროატლანტიკური ინტეგრაციის მხარდამჭერ დეკლარაციას მიიღებენ.