ჩედვიკ ბოუზმენის გარდაცვალება მარველის სამყაროსა და ფანებისთვის ძალიან მოულოდნელი და გულდასაწყვეტი იყო. მიუხედავად იმისა, რომ მსოფლიომ ჩედვიკის შავი პანთერა დაკარგა, ახალ ფილმში, სახელად Black Panther: Wakanda Forever, მის კოსტიუმს სხვა პერსონაჟი მოირგებს.

ცოტა ხნის წინ ახალი ფილმის მეორე ტრეილერი გამოვიდა,რომელიც ჩედვიკ ბოუზმენის გმირის გარდაცვალების შემდეგ ვაკანდაში მიმდინარე მოვლენებზე მოგვითხრობს. ტრეილერში ახალ კოსტიუმსაც ვხედავთ და ფანები დარწმუნებულები არიან, რომ მის მიღმა გარდაცვლილი მეფის უმცროსი და, შური იმალება.

ამ მოსაზრების დასადასტურებლად ერთ-ერთი მთავარი "სამხილი" ახალი კოსტიუმია — კოსტიუმზე ისეთივე ტრადიციული წერტილებია დატანილი, როგორსაც შური სახეზე ატარებს.

ფოტო: Walt Disney

ფოტო: Walt Disney

მიუხედავად იმისა, რომ მოსაზრება ოფიციალურად არ დადასტურებულა, მას უამრავი ადამიანი ემხრობა:

"შური ახალი შავი პანთერაა და მისი კოსტიუმის დიზაინი საოცარია"

"მე კინოთეატრში, როცა აღმოჩნდება, რომ შავი პანთერა შურია"

"მე: ახალი შავი პანთერა აშკარად შურია. რატომ იკატუნებენ თავს, თითქოს სიურპრიზი იყოს
მე კინოთეატრში, როცა შური შავი პანთერა აღმოჩნდება:"

ვინაა ახალი შავი პანთერა, ამას ზუსტად ფილმის ნახვისას გავიგებთ — Black Panther: Wakanda Forever-ის პრემიერა 11 ნოემბერსაა დაგეგმილი.

შეგახსენებთ, რომ ჩედვიკ ბოუზმენი 2020 წელს ნაწლავის კიბოს დიაგნოზით გარდაიცვალა. მისი გარდაცვალება შოკისმომგვრელი იყო გულშემატკივრებისთვის, რადგან ჩედვიკს დიაგნოზი საზოგადოებისთვის არ გაუმხელია.

ამ ტრაგედიამ მარველის ყველა ფანი დაამწუხრა. ამასთანავე, ყველას გაუჩნდა კითხვა, თუ რა ბედი ეწეოდა შავ პანთერას. მარველმა გადაწყვიტა, ჩედვიკის პერსონაჟი სხვა მსახიობით არ ჩაენაცვლებინა და მისი ხსოვნისთვის პატივი ასე მიეგო. ფანების პეტიციის მიუხედავად, რომლითაც ჩედვიკის პერსონაჟის ისტორიის გაგრძელებას ითხოვდნენ, მარველს გადაწყვეტილება არ შეუცვლია.