კულტურისა და სპორტის მინისტრმა იმედის ეთერში განაცხადა, რომ ამას ათეულობით ადამიანი შეესწრო.

რატომ არის მნიშვნელოვანი: 22 სექტემბერს პარლამენტში თეა წულუკიანმა თქვა, რომ მას, როგორც ქალ მინისტრს, სპორტის ფედერაციებთან ქალთა უფლების კუთხით ბევრი პრობლემა აქვს.

  • მანვე აღნიშნა, რომ სპორტში ძალადობა სერიოზული პრობლემაა და ამაზე სამუშაოა.
  • შემდეგ მან საზოგადოებრივი მაუწყებლის ეთერში განაცხადა, რომ კონკრეტული ფედერაციის პრეზიდენტმა გადაწყვიტა, მისთვის ხელი დაერტყა, მაგრამ არ დაუკონკრეტებია, ვინ.

დეტალები: მინისტრი, სავარაუდოდ, გულისხმობს კრივის ფედერაციის პრეზიდენტს, დავით წიკლაურს, სახელი არც იმედის ეთერში უხსენებია და მხოლოდ ის თქვა, რომ ამ ფედერაციის ხელმძღვანელია.

  • მისი თქმით, როცა ამ პირმა დასარტყმელად გაიწია, ერთ-ერთი მწვრთნელი და მოადგილე გადაეფარა.
  • "მისი ეს გამოქანება დასარტყმელად მოჰყვა იმას, რომ ის ითხოვდა ფულს და როცა მიიღო პასუხი, რომ ეს შეუძლებელია ახლა, მოდი ვიმუშავოთ, გამოგზავნეთ რა გაქვთ საჭიროებები და ვიმსჯელებთ, მან გააგრძელა შეურაცხყოფა ჩემი მოადგილის, შემდეგ..." — განაცხადა მინისტრმა.
  • მისივე თქით, თავდამსხმელი შეეცადა ისე წარმოეჩინა, თითქოს ის იყო დამნაშავე, ამიტომ წულუკიანმა კიდევ ერთხელ მოუწოდა ქალებს, არ შეეგუონ მოძალადეების მსგავს ქცევას.
  • "მე ამას არ შევეგუებით და ჩვენ ვნახავთ ცოტა ხანში სად იქნება ის, სად ვიქნები მე. მე მუშტი არ მაქვს, რომ მოკვრივეს ვაჯობო, მაგრამ ქართული კრივი რომ არ დაიღუპება, ამას ვაჩვენებ", — აღნიშნა მან.
  • გარდა ამისა, წულუკიანმა თქვა, რო ეს არის ადამიანი, რომელიც ოპოზიციაში ყოფნისას ქართული ოცნების წევრებს თავს ესხოდა, რადგან "წინა სპორტის მინისტრი მას ამუშავებდა ზონდერად".

ქალმა დეპუტატებმა, ხათუნა სამნიძემ, თამუნა კორძაიამ, ანა ბუჩუკურმა და თეონა აქუბარდიამ წულუკიანს მხარდაჭერა გამოუცხადეს.

  • დეპუტატებმა განაცხადეს, რომ არ შეიძლება ქალი მინისტრი იმ მდგომარეობაში იყოს, რომ მას ფიზიკურ შეხლამდე უწევდეს საკუთარი ფუნქციების განხორციელება და კაცებთან ურთიერთობა.
  • ასევე, აღნიშნეს, რომ ნებისმიერი ქალი, რომელიც პოლიტიკაშია, უთანასწორობას განიცდის, ამიტომ, პოლიტიკური კუთვნილების მიუხედავად, მათ მიმართ სოლიდარულები იქნებიან.
  • დეპუტატები ამბობენ, რომ ამ საკითხით, როგორც კაცი დეპუტატები, ასევე, უფლებადამცველები და გენდერული საბჭო უნდა დაინტერესდეს.