წინასწარი შეთანხმებით ჯგუფის მიერ, განსაკუთრებით დიდი ოდენობით ყალბი აქციზური მარკების დამზადება-გასაღების ბრალდებით, თურქეთის ორი და საქართველოს ერთი მოქალაქე დააკავეს.

საქართველოს ფინანსთა სამინისტროს საგამოძიებო სამსახურის მტკიცებით, დანაშაულებრივი ჯგუფის წევრებმა, უახლესი პოლიგრაფიული ტექნოლოგიების გამოყენებით, დაამზადეს თამბაქოს ნაწარმისთვის განკუთვნილი, 46 ათასი ყალბი ქართული აქციზური მარკა, რომლის ნამდვილი აქციზური მარკისგან გარჩევა სპეციალური მოწყობილობის გამოყენების გარეშე, ფაქტობრივად შეუძლებელია.

საქმეზე გამოძიება მიმდინარეობს საქართველოს სისხლის სამართლის კოდექსის მე-200 პრიმა მუხლის მეორე ნაწილის "ბ" და მე-4 ნაწილის "ა" პუნქტით. ბრალდებულებს ცხრიდან 12 წლამდე თავისუფლების აღკვეთა ემუქრებათ.