დაზვერვის ცნობით, ნაწილობრივი მობილიზაციის ფარგლებში სამხედრო ბაზებზე პირველი ჯგუფების ჩასვლა უკვე დაიწყო.

რატომ არის მნიშვნელოვანი: 21 სექტემბერს პუტინმა რუსეთში "ნაწილობრივი მობილიზაცია" გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ, საზღვრებთან და აეროპორტებში რამდენიმესაათიანი რიგებია.

  • აქამდე რუსეთი უარყოფდა და ცდილობდა დაემალა, რომ უკრაინაში ფრონტის ხაზზე პრობლემები ჰქონდა და პერსონალის დიდი დანაკლისი განიცადა;
  • ამ გადაწყვეტილებით კი გამოჩნდა, რომ რუსეთი არსებული რესურსებით უკრაინულ ძალებს ვერ უმკლავდება.

დეტალები: ბრიტანეთის დაზვერვა აღნიშნავს, რომ უკვე ათიათასობით გამოძახების დოკუმენტია გამოცემული.

  • მათი თქმით, ხალხის გადამზადების პროცესში რუსეთი ადმინისტრაციული და ლოგისტიკური გამოწვევების პირისპირ აღმოჩნდება;
  • დაზვერვის განცხადებით, დასავლური ჯარებისგან განსხვავებით, რუსეთის არმია სამხედროებს არა სპეციალურ სასწავლო დაწესებულებებში, არამედ დაბალი დონის ოპერატიულ ქვედანაყოფებში ამზადებს.

დაზვერვის შეფასებით, რუსეთმა მობილიზაცია ნაჩქარევად დაიწყო.

  • მათი თქმით, ამას ემატება სამხედრო წვრთნების სიმცირე, რაც იმას გამოიწვევს, რომ სამხედროები ბრძოლის ველზე მინიმალური მომზადებით განლაგდებიან.