ერთ-ერთი მძევლის მიერ ბოლოს გამოქვეყნებულ ვიდეოში ისმის საუბარი, რომლის მიხედვითაც, ქუთაისში ბანკში შეჭრილმა პირმა მოთხოვნები შეცვალა.

რატომ არის მნიშვნელოვანი: შსს-ს ინფორმაციით, შეიარაღებულ
პირს 12 მძევალი ჰყავს აყვანილი.

  • ბანკიდან გავრცელებულ კადრებში ჩანს, რომ ის მძევლებს მისი მოთხოვნების გაჟღერებას, ამბის გავრცელებას აიძულებს და შესასრულებლად დროს იძლევა;
  • მან მძევლები დაახლოებით 11 საათის შემდეგ აიყვანა.

დეტალები: როგორც მძევალი ჰყვება, თავდამსხმელი ახლა მილიონ ნახევარს და ორი მძევლის დატოვებას ითხოვს — თავდაპირველად მისი მოთხოვნა 2 მილიონი დოლარი იყო.

  • "იგივე მდგომარეობაა, უნდა ფული, დაიტოვებს ორ გოგოს და დანარჩენს გამოუშვებს";
  • "ცუდადაა, ექიმი სჭირდება, 1,5-ზე ჩამოვიდა, დავიტოვებ ორ გოგოს და დანარჩენს გავუშვებო, ვინ არის ის ორი გოგო არ ვიცი";
  • ვიდეოში ისმის, სავარაუდოდ, მომლაპარაკებლის ხმა, რომელიც შეიარაღებულ პირს ეუბნება, რომ ლარიდან დოლარში გადახურდავებას დრო სჭირდება;
  • ასევე, კადრებში ჩანს, რომ თავდამსხმელს, სავარაუდოდ, ასაფეთქებელ ნივთიერებაზე თავი მოხსნილი აქვს და იმუქრება, რომ სამართალდამცავების შესვლის შემთხვევაში ააფეთქებს.

მძევლები: მათი რაოდენობის შესახებ შსს-მ ზუსტი ინფორმაცია რამდენიმე საათის შემდეგ გაავრცელა. მედიებში გავრცელებული ცნობით, მათ შორის 2 ბანკის თანამშრომელია.

  • მედიებში ვრცელდება ცნობები, რომ რამდენიმე მძევალი გათავისუფლებულია, თუმცა შინაგან საქმეთა სამინისტროში ინფორმაციას არ ადასტურებენ;
  • ამასთან, სავარაუდოდ, შსს-სთვის თავდამსხმელის ვინაობა ცნობილია, რადგან ერთ-ერთ ვიდეოში სახელს ახსენებენ, თუმცა დაზუსტებით რთულია იმის თქმა, ასე თავდამსხმელს მიმართავენ, თუ სხვას.

შსს-მ დღის განმავლობაში ორი განცხადება გაავრცელა, თუმცა ამ დრომდე მომხდარს არ გამოხმაურებია შს მინისტრი, ვახტანგ გომელაური — ის შემთხვევის ადგილას მხოლოდ 5 საათის შემდეგ ჩავიდა.

  • ქართული ოცნებიდან პირველი მომხდარზე კომენტარი ირაკლი ქადაგიშვილმა გააკეთა და თქვა, რომ "ასეთი მოვლენები მთელ მსოფლიოში ხდება და მოხდა აქაც".

გამოძიება სისხლის სამართლის კოდექსის 144-ე, 236-ე, 323-ე და 329-ე მუხლებით დაიწყო, რაც გულისხმობს:

  • მძევლად ხელში ჩაგდებას;
  • საბრძოლო მასალის მართლსაწინააღმდეგო შეძენა/შენახვა/ტარებას;
    ტერორისტულ აქტს;
  • ტერორისტული მიზნით მძევლად ხელში ჩაგდებას.

არქივიდან: ბოლო რამდენიმე წლის განმავლობაში ბანკში შეიარაღებული შეჭრისა და ყაჩაღობის მცდელობის არაერთი შემთხვევა დაფიქსირდა, მათი ნაწილი საქართველოს ბანკში იყო.

  • ყველაზე გახმაურებული შემთხვევა ბადრი ესებუას უკავშირდება, რომელმაც ზუგდიდში მძევლები აიყვანა, რამდენიმე საათში კი მძევლებთან ერთად ბანკი დატოვა და გაიქცა.
  • შემთხვევის შედეგად არავინ დაშავებულა, ესებუა კი თანხასთან ერთად მიიმალა — როგორც შს მინისტრი ყოველ ჯერზე ამბობს, მას ეძებენ.