დღეს პარლამენტში იურიდიულ საკითხთა კომიტეტის სამუშაო ჯგუფში სასამართლოს რეფორმაზე მსჯელობდნენ. სახალხო დამცველის მოადგილე, გიორგი ბურჯანაძე წერს, რომ შეხვედრა 6 საათს გაგრძელდა.

რატომ არის მნიშვნელოვანი: იურიდიულ საკითხთა კომიტეტის სამუშაო ჯგუფი ერთ-ერთია იმ ჯგუფებს შორის, რომელიც ევროკავშირის რეკომენდაციების შესასრულებლად პარლამენტში შეიქმნა.

  • ბურჯანაძე აღნიშნავს, დღეს, 19 სექტემბერს გამართულ შეხვედრაზე განსახილველი საკითხი უმაღლესი საბჭოს რეფორმა იყო.

დეტალები: ბურჯანაძე წერს, რომ შეხვედრაზე არცერთი განხილული საკითხი არ გაითვალისწინეს.

  • აღნიშნავს, რომ იუსტიციის უმაღლეს საბჭოში მხოლოდ მოსამართლეები +1 ხმა იქნება საჭირო გადაწყვეტილების მისაღებად როგორც დღესაა — "ზოგგან მხოლოდ მოსამართლეების ხმები იქნება საჭირო; არაფერი იცვლება ამ მიმართულებით";
  • "იუსტიციის უმაღლესი საბჭოს მოსამართლე წევრების არჩევის არსებული მოდელი არ იცვლება".
  • ბურჯანაძე ამბობს იმასაც, რომ შეხვედრაზე აშშ-ს საელჩოს არცერთი რეკომენდაცია არ გაიზიარეს — "მოვისმინეთ ვენეციის კომისიის მოსაზრებების სხვადასხვა "ინტერპრეტაციები".

ბურჯანაძის განცხადებით, პოზიციებთან მიმართებით პარლამენტს შესთავაზეს ვენეციის კომისიისთვის მიმართვა, რათა მათ შეეფასებინათ ეწინააღმდეგება თუ არა კონსტიტუციას მათი ვერსია.

  • "პასუხად მივიღეთ რომ ჩვენ სუვერენული ქვეყანა ვართ და ვენეციის კომისიას ვერ ვკითხავთ ყველაფერზე აზრსო".
  • ბურჯანაძე აღნიშნავს, რომ რადგან შეხვედრას არ ესწრებოდნენ არასამთავრობო ორგანიზაციები, მნიშვნელოვანია, საზოგადოებას ჰქონდეს საკმარისი ინფორმაცია მართლმსაჯულების გარშემო მიმდინარე საკითხების თაობაზე.

NGO: სამუშაო ჯგუფის შეხვედრას არ დაესწრნენ სოციალური სამართლიანობის ცენტრი და ახალგაზრდა იურისტთა ასოციაციის წარმომადგენლები, რადგან ქართულმა ოცნებამ სამართლიან არჩევნებს (ISFED) სამუშაო ჯგუფებში მონაწილეობის შესაძლებლობა არ მისცა.

  • შეხვედრის დაწყებამდე სოციალური სამართლიანობის ცენტრის მართლმსაჯულების და დემოკრატიის პროგრამის დირექტორმა გურო იმნაძემ დაწერა, რომ არ შეიძლება, ქართულმა ოცნებამ "თავისი ხუშტურებით გადაწყვიტოს", რომელი ორგანიზაციის ხმა გახმიანდება სამუშაო ჯგუფში და რომლის — არა.