საქართველოს შინაგან საქმეთა სამინისტროში, გამოძიების ინტერესებიდან გამომდინარე, არ ამბობენ, დააკავეს თუ არა ვინმე სამი დღის წინ, 19 მაისს, ახალ მზიურში ბომბის შესახებ ცრუ შეტყობინების გამო.

როგორც On.ge-ს უწყებაში განუცხადეს, შესული შეტყობინების გამო გამოძიება ამ დრომდე სისხლის სამართლის კოდექსის 236-ე მუხლით მიმდინარეობს. ეს მუხლი ასაფეთქებელი მოწყობილობის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღებას გულისხმობს.

იმის მიუხედავად, რომ სამართალდამცავებმა ახალ მზიურში ასაფეთქებელი მოწყობილობა ვერ აღმოაჩინეს, საქმე ამ დრომდე არ გადაკვალიფიცირებულა.

საქართველოს სისხლის სამართლის კოდექსში არსებობს მუხლი (331), რომელითაც ტერორიზმის შესახებ ცრუ შეტყობინება ისჯება ჯარიმით ან გამასწორებელი სამუშაოთი ვადით ერთიდან ორ წლამდე, ანდა თავისუფლების აღკვეთით ვადით ორიდან ხუთ წლამდე. იმ შემთხვევაში, თუ დანაშაული ჩადენილია წინასწარი შეთანხმებით ჯგუფის მიერ, ან არაერთგზის, ან მნიშვნელოვანი ზიანი გამოიწვია ისჯება თავისუფლების აღკვეთით ვადით ხუთიდან შვიდ წლამდე.

საქართველოს შინაგან საქმეთა სამინისტრო ბომბის შესახებ შესული შეტყობინებების შესახებ გამოძიებას, რიგ შემთხვევებში, სწორედ 331-ე მუხლით იწყებდა. მაგალითად, 2013 წლის 12 სექტემბერს, თბილისის აეროპორტში, მსგავსი შეტყობინების გამო, გამოძიება ამ მუხლით მიმდინარეობდა.

19 მაისს, ახალ მზიურში, თავისუფალი კინოჩვენება უნდა გამართულიყო. კინოჩვენების დაწყებამდე, მზიურთან თავი მოიყარეს ჰომოფობიური განწყობების მქონე პირებმა. მათი მიზანი ფილმის თავისუფალი ჩვენების ჩაშლა იყო. ადგილზე მყოფი On.ge-ს ჟურნალისტის თქმით, შეკრებილების მხრიდან ისმოდა შეურაცხმყოფელი შეძახილები.

ფილმი, სახელად "პრაიდი", ჰომოფობიასთან, ტრანსფობიასთან და ბიფობიასთან ბრძოლის საერთაშორისო დღესთან დაკავშირებით შეირჩა და ის ტეტჩერის დროინდელ ბრიტანეთში, ლგბტ პირების მხრიდან სამოქალაქო აქტივიზმში ჩართულობის მნიშვნელობას ეხება.