ჩხარტიშვილი უკრაინულ პორტალზე გამოქვეყნებულ ინფორმაციას ეხმაურება და ინფორმაციის გამავრცელებლებს "რეპუტაციული ზიანის მიყენებისთვის" საერთაშორისო სასამართლოებში ფასის გადახდით "ემუქრება.

რატომ არის მნიშვნელოვანი: სიაში, რომლითაც ბიძინა ივანიშვილთან ერთად 11 ქართველის დასანქცირებას ითხოვენ, ვანო ჩხარტიშვილიც მოხვდა.

• დახასიათებაში ვკითხულობთ, რომ მას ივანიშვილთან მჭიდრო კავშირი აქვს.
• განხილულია ჩხარტიშვილის ბიზნეს საქმიანობაზეც. საუბარია წარსულში მის სავარაუდო კავშირებზე სხვადასხვა კომპანიასთან, მათ შორის, რუსულ სახელმწიფო კომპანია როსნეფტთან.

დეტალები: ჩხარტიშვილ რუსულ კომპანია როსნეფტთან, პეტროკას, გალფთან და ფოთის პორტთან კავშირსა და პარტნიორობას უარყოფს და სიას მტკნარ სიცრუეზე აგებულსა და "ფეიკს" უწოდებს.

• "ფალსიფიკაციაზე მეტყველებს ისიც, რომ ოფიციალურმა უწყებებმა კატეგორიულად უარყვეს მითითებული პირების მიერ დასახელებული სანქცირებული ტვირთების საქართველოში შემოტანის ფაქტი".

ჩხარტიშვილი წერს, რომ მისი დაფუძნებული კომპანიები სმარტ კაპიტალის ჰოლდინგის ქოლგის ქვეშ საქმიანობენ და ღია და გამჭვირვალე ბიზნეს სტრუქტურები არიან.

• მისი თქმით, გამიზნულად არ მონაწილეობენ სახელმწიფო ტენდერებში, ხოლო საქმიანობის ყოველწლიურ აუდიტს აკეთებს მსოფლიოს ოთხეულში შემავალი კომპანია დელოიტი, რომელიც ჰოლდინგში შემავალ ყველა ფირმას ფარავს.

მისი მტკიცებით, აღნიშნული პირები "დაუსაბუთებელი ბრალდებების" მიზანი დაძაბული პოლიტიკური დღის წესრიგის შექმნაა.

• ამბობს, რომ ცრუ ბრალდებებმა, შესაძლოა, საფრთხე შეუქმნას მის პარტნიორ დიდი ბრიტანეთის მოქალაქეებს, რის გამოც, ლონდონის ავტორიტეტული საერთაშორისო აუდიტორული კომპანიებმა მიყენებული ზარალის მასშტაბების შესწავლა დაიწყო.
• ასევე, იგეგმება, საერთაშორისო და გაერთიანებული სამეფოს სასამართლო იურისდიქციაში პროცედურების დაწყება.
• "ანალოგიური რეაგირება გვექნება ნებისმიერ მცდელობებზე, ვისგანაც არ უნდა მოდიოდეს იგი, ცრუ ინფორმაციების ტირაჟირებით საქმიანი რეპუტაცია შემილახონ მე და ჩემს კომპანიებს".

რა ვიცით პლატფორმაზე: აუცილებელია აღვნიშნოთ, რომ ამჯერად გამოქვეყნდა არა უკვე სანქცირებულთა, არამედ იმ პირთა სია, ვისთვის დაწესებასაც ითხოვენ.

• ვებგვერდს ომი და სანქციები ჰქვია — ის უკრაინის საგარეო საქმეთა სამინისტროსა და ანტიკორუფციული სააგენტოს მხარდაჭერითაა შექმნილი.
• დახასიათებიდან ვიგებთ, რომ ეს არის პორტალი, სადაც შეგიძლიათ მარტივად იპოვოთ ადამიანი ან კომპანია, რომელიც, თქვენი აზრით, ყველაზე მეტად იმსახურებს სანქციებს და მოუწოდოთ პასუხისმგებელ პირებს, რომ ისინი შესაბამის სიაში შეიყვანონ.
• ასევე, განმარტავენ, რომ ის შექმნილია, რათა უკრაინის პარტნიორებსა და მოკავშირეებს სასარგებლო ინფორმაცია მიაწოდონ სამიზნეების მოსაძებნად.
• კანდიდატების შეყვანა შეუძლია ყველას — მითითებულ მეილზე უნდა გაგზავნო იმ პირის ან კომპანიის ინფორმაცია, ვისი სანქცირებაც გსურს, მას განიხილავენ და საფუძველს არსებობის შემთხვევაში, გაუგზავნიან პასუხისმგებელ პირებს.