სამხრეთით ბრძოლა გრძელდება — უკრაინული მედიის ცნობით, 2 სექტემბრის დილას ოკუპირებულ ხერსონში, სულ მცირე, 6 აფეთქების ხმა იყო.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა და ხერსონის რეგიონში შეიარაღებულმა ძალებმა რუსების თავდაცვის პირველი ხაზი გაარღვიეს.

• ხერსონი რუსეთისთვის მნიშვნელოვანი რეგიონია, რადგან სწორედ ამ ტერიტორიის დახმარებით ოკუპირებული ყირიმიდან საბრძოლო იარაღისა და პერსონალის მიწოდებას ახდენს.
• რუსეთი ომის დაწყებიდან აქტიურად უტევდა ხერსონის რეგიონს. მტრის ჯარები ქალაქში პირველ მარტს შეიჭრნენ, თუმცა საკრებულოს დაკავება 25 აპრილამდე ვერ შეძლეს.
• ხერსონის მოსახლეობა მასობრივ აქციებს აწყობდა და ოკუპაციას აპროტესტებდა. ხელისუფლების ინფორმაციით, რეგიონში ახლა მოსახლეობის 40-50%-ია დარჩენილი.
• დიდი ბრიტანეთის დაზვერვა აცხადებს, რომ ხერსონის დაკარგვა ძირს უთხრის რუსეთის მცდელობებს, ომი წარმატებულად წარმოაჩინოს.

რა ხდება ამ დროისთვის: უკრაინა აცხადებს, რომ მათი კონტრშეტევის დაწყების შემდეგ, ხერსონში ოკუპანტებმა "მნიშვნელოვანი დანაკარგები" განიცადეს.

• "ადამიანური ძალის დანაკარგი ათეულიდან ასეულამდე გაიზარდა. დამწვარია აღჭურვილობაც", — განაცხადა სამხრეთში უკრაინის ჯარის სპიკერმა.
• "შესაბამისად, ჩვენი წარმატებები საკმაოდ დამაჯერებელია. ვფიქრობ, ძალიან მალე პოზიტიური ინფორმაციის გავავრცელებთ", — თქვა მან.
• სამხრეთის ოპერატიული სარდლობის თანახმად, მიმდინარე სამიზნეებს შორისაა მდინარე დნიპროსთან სამი მნიშვნელოვანი ხიდი, ანტონივსკი, კახოვსკი და დარიივკსი.

თავდასხმებს არ წყვეტს რუსეთი — უკრაინული ძალები ცდილობენ ოკუპანტებს მდინარის ჩრდილოეთით მათი ქვედანაყოფების მომარაგებაში ხელი შეუშალონ.

• თუმცა, საოკუპაციო ძალები, ფრონტის ხაზის მიღმა, რომელიც, დაახლოებით, ხერსონის ჩრდილოეთ საზღვარზე გადის, უკრაინული დასახლებების დაბომბვას აგრძელებენ.
• უკრაინსკა პრავდა წერს, რომ ოკუპანტებს კვლავ აქვთ ხერსონის რეგიონში ფსევდო რეფერენდუმის ჩატარების გეგმა და აგრძელებენ ნიკოლაევის, დნეპროპეტროვსკის, ხარკოვის, დონეცკისა და ლუგანსკის რეგიონებზე თავდასხმას.
• მათი ცნობით, ხერსონში მთელი ღამე იყო აფეთქებები — მძიმე ბრძოლები გრძელდება კახოვკასა და ბერისლავის რაიონებში, მათ შორის, რამდენიმე დასახლება განადგურების პირასაა.

ბოლო ორი დღე: პირველ სექტემბერს უკრაინის შეიარაღებულმა ძალებმა კახოვკას ხიდს დაარტყეს და ოკუპანტებს ახალი გადასასვლელის გაკეთების საშუალება არ მისცეს.

• მხოლოდ ერთ დღეში უკრაინელმა დამცველებმა 33 რუსი მოკლეს, გაანადგურეს 4 ტანკი, 3 ჰაუბიცა, 4 ჯავშანმანქანა და საბრძოლო მასალის საწყობი;

• უკრაინის პრეზიდენტის ადმინისტრაციის უფროსის მრჩევლის, ალექსეი არესტოვიჩის განცხადებით, ოპერაცია გეგმის მიხედვით მიდის — მისი თქმით, მართალია უკრაინას ხერსონი ჯერ არ დაუბრუნებია, მაგრამ ეს არ ნიშნავს, რომ სამხრეთის მიმართულებით შეტევა შეჩერდა ან ჩავარდა;
• მისი თქმით, უკრაინელი სამხედროები სისტემატურად ანადგურებენ საწყობებსა და იარაღებს.

რას ამბობენ ექსპერტები: აშშ-ის საჰაერო ძალების წარმომადგენლის, ჯასტინ კონელის შეფასებით, ამ კონტრშეტევით დროთა განმავლობაში ისეთი ოპერაცია ფორმირდება, რომელიც მიმართული იქნება რუსული ძალებისა შესუსტებაზე.

• უკრაინის ყოფილი თავდაცვის მინისტრი ანდრეი ზაგოროდნიუკი The Washington Post-თან ამბობს, რომ კონტრშეტევას იმდენი დრო უნდა დასჭირდეს, რამდენიც საჭიროა;
• "არავის არ დააჩქარებს მას მხოლოდ იმიტომ, რომ ხალხი რაღაც დრამატულსა და ამაღელვებელს ელოდება. ისინი ამას ფრთხილად გააკეთებენ, რამდენ ხანსაც საჭირო იქნება".