თბილისის მერის ადვოკატმა, დიმიტრი გაბუნიამ On.ge-ს განუცხადა, რომ მერი ჟურნალისტსა და არხს 5 ივლისს გადაცემაში ნათქვამი ფრაზის გამო უჩივის.

რატომ არის მნიშვნელოვანი: მმართველი გუნდი კრიტიკულ მედიებს ხშირად ესხმის თავს, მათი განცხადებები კი ჟურნალისტებზე ძალადობის შემთხვევებს ახალისებს.

  • ვინაიდან, ქართული ოცნება მედიების წინააღმდეგ იყენებს სანქცირების მექანიზმებსაც, შესაძლოა, პარტიის გენერალური მდივნის ეს დავაც ასე იყოს აღქმული.
  • მაგალითად, 23 აგვისტოს კომუნიკაციების კომისიამ ქართული ოცნების სარჩელის საფუძველზე მთავარი არხი 118 000 ლარით დააჯარა, ხოლო ფორმულა და TV პირველი კი გააფრთხილა.

დეტალები: გაბუნიას თქმით, კალაძე "პატივის, ღირსებისა და საქმიანი რეპუტაციის შემლახველი ცნობების" უარყოფასა და მორალური ზიანის სახით 100 000 ლარის ანაზღაურებას ითხოვს.

  • როგორც ის ამბობს, გადაცემაში მამულაშვილმა თქვა, "სიმართლესთან შეუსაბამო" ინფორმაცია, რომ კალაძემ "ერთ-ერთ ტენდერში ჯიბეში ჩაიდო 60 მილიონი".
  • მისი თქმით, მხარისგან შესაგებელს ელოდებიან, რისთვისაც 3 დღე აქვთ დარჩენილი.
  • "როცა წარმოადგენენ წერილობით პასუხს, და შესაბამის დოკუმენტაციას, თუ რამე გააჩნიათ ხელთ, ცოტა ეჭვი მეპარება, მაგრამ მაინც, ამის შემდეგ სასამართლო სხდომა დაინიშნება".

TV პირველის იურისტის თქმით, კალაძის მოთხოვნა დაუსაბუთებელია და მხოლოდ ტელევიზიის დისკრედიტაციას და მისთვის უზომოდ დიდი პასუხისმგებლობის დაკისრებას ემსახურება.

  • ქეთი ზანდუკელი აღნიშნავს, რომ ინფორმაცია პირველად არა მამულაშვილის ეთერში, არამედ 2019 წლის 18 მაისს გავრცელდა და მას შემდეგ არაერთმა წყარომ, თუ პირმა საჯარო სივრცეში გაიმეორა.