ხერსონში საბრძოლო მოქმედებები გრძელდება. Unian-ის ცნობით, უკრაინულმა ჯარმა ერთი დღის განმავლობაში სამხრეთ ნაწილში 117 ოკუპანტის ლიკვიდირება და 30-ზე მეტი რუსული საბრძოლო ტექნიკის განადგურება შეძლო.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა და ხერსონის რეგიონში შეიარაღებულმა ძალებმა რუსების თავდაცვის პირველი ხაზი გაარღვიეს.

• ხერსონი რუსეთისთვის მნიშვნელოვანი რეგიონია, რადგან სწორედ ამ ტერიტორიის დახმარებით ოკუპირებული ყირიმიდან საბრძოლო იარაღისა და პერსონალის მიწოდებას ახდენს.
• რუსეთი ომის დაწყებიდან აქტიურად უტევდა ხერსონის რეგიონს. მტრის ჯარები ქალაქში პირველ მარტს შეიჭრნენ, თუმცა საკრებულოს დაკავება 25 აპრილამდე ვერ შეძლეს.
• ხერსონის მოსახლეობა მასობრივ აქციებს აწყობდა და ოკუპაციას აპროტესტებდა. ხელისუფლების ინფორმაციით, რეგიონში ახლა მოსახლეობის 40-50%-ია დარჩენილი.
• დიდი ბრიტანეთის დაზვერვა აცხადებს, რომ ხერსონის დაკარგვა ძირს უთხრის რუსეთის მცდელობებს, ომი წარმატებულად წარმოაჩინოს.

ბრიტანეთის დაზვერვის განცხადებით, 29 აგვისტოს უკრაინული ძალები რუსულ არმიაზე შეტევას რამდენიმე მიმართულებით აგრძელებენ. ასევე, მათ სამხრეთით ფრონტის ხაზის გადაწევა შეძლეს.

• მათი თქმით, რუსეთი კვლავ ეძებს გზებს უკრაინის წინააღმდეგ მებრძოლი ჯარის გასაძლიერებლად.

ყოველდღიურ მიმოხილვაში დაზვერვა ამბობს, რომ რუსეთი, ახლა შეეცდება ბრძოლაში ხარვეზები მობილური სარეზერვო ნაწილების გამოყენებით შეავსოს.

• მათი ვარაუდით, რუსეთი ახლადშექმნილ მოხალისეთა ბატალიონს გამოიყენებს, რომლებიც 24 აგვისტოს ხერსონში მოსკოვის მახლობლად მდებარე ბაზიდან გაემგზავრნენ.
• აღნიშნავენ, რომ ქვედანაყოფების ეფექტიანობა უცნობია. ასევე, სავარაუდოა, რომ სამხედროების რაოდენობა საკმარისი არ არის და არც სათანადოდ არიან მომზადებულები.

რას ამბობენ ექსპერტები: მათი თქმით, მოხალისეთა ბატალიონის განლაგება იმაზე მიუთითებს, რომ რუსეთი დონეცკსა და ხერსონზე შეტევისთვის საბრძოლო ძალის აღდგენას ცდილობს.

• გარდა ამისა, ანალიტიკოსების პროგნოზით, მიმდინარე წლის ერთ-ერთი ყველაზე მძიმე შეტაკება სექტემბერსა და ოქტომბერში გაიმართება და უპირატესობა უკრაინის მხარეს იქნება.
• მათივე ვარაუდით, საომარი მოქმედებების აქტიურობა ნოემბერში, უამინდობის გამო ჩაცხრება.

კონტრშეტევის ფონზე ზაპოროჟიეს ოლქის საოკუპაციო ადმინისტრაციის ე.წ ხელმძღვანელი ყირიმში გაიქცა.

• მან საბაბად "ოჯახური გარემოება" მოიყვანა და თქვა, რომ რეგიონში ე.წ რეფერენდუმისთვის მზადება გაგრძელდება.
• ის პირველი არ არის, ვინც კონტრშეტევის შემდეგ უკრაინის სამხრეთით მდებარე ოლქი დატოვა. მანამდე, ხერსონის საოკუპაციო ადმინისტრაციის ე.წ ხელმძღვანელმა ვიდეო ჩაწერა, სადაც სამხრეთში "რუსეთის წარმატებებზე" ისაუბრა.

კონტექსტი: 30 აგვისტოს CNN-მა წყაროზე გაავრცელა ინფორმაცია, რომ უკრაინულმა ჯარმა ოკუპანტებისგან ხერსონთან მდებარე 4 სოფელი გაათავისუფლა.

• მშვიდობიანი მოქალაქეებისა და ჯარის უსაფრთხოების მიზნით, შეიარაღებულ ძალებს ეს ინფორმაცია ამ დრომდე არ დაუდასტურებიათ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.