ქუეიდინ ბეილსი 11 წლის ავსტრალიელი ბიჭია, რომელსაც ნანიზმის გავრცელებული ფორმა, აქონდროპლაზია, აქვს. ბიჭი 2020 წელს მსოფლიოს ყურადღების ცენტრში მას შემდეგ მოიქცა, რაც ბიჭის დედამ ვიდეო დადო, რომელშიც მსოფლიოს ანახა, თუ როგორ იტანჯებოდა მისი შვილი სკოლაში ჩაგვრის გამო.

ვიდეოში ბეილსი გაუჩერებლად ტირის და სიკვდილს ნატრობს. ბიჭის დედა ვიდეოში საუბრობს იმაზე, თუ რა გავლენა აქვს ბულინგს 9 წლის ბიჭზე, რომელსაც სკოლაში სიარული და განათლების მიღება უნდა, პარალელურად კი მშობლებს სთხოვს, შვილებს ასწავლონ, რომ სხვებს ასე არ მოექცნენ. ვიდეოს უამრავი ცნობილი ადამიანი გამოეხმაურა, მათ შორის კი ცნობილი ფილმის, Mad Max: Fury Road-ის რეჟისორი ჯორჯ მილერია.

რეჟისორის თქმით, ბეილსი Mad Max: Fury Road-ის მეორე ნაწილში, Furiosa-ში ითამაშებს. აღსანიშნავია, რომ ბიჭი მანამდე მილერის კიდევ ერთ ფილმში, Three Thousand Years of Longing-შიც გამოჩნდება: "მან დავალება ისე კარგად შეასრულა, რომ Furiosa-ში პატარა როლი მიიღო". რეჟისორის თქმით, ბავშვისთვის როლის მიცემა 2020 წელს გავრცელებულმა ვიდეომ გადააწყვეტინა.

აღსანიშნავია, რომ ქუეიდინის ტირილის ვიდეომ უამრავი ცნობილი ადამიანის ყურადღება მიიპყრო. მათ შორის მსახიობი ჰიუ ჯეკმენიცაა, რომელმაც ბავშვისთვის ვიდეოც კი ჩაწერა:

"ქუეიდინ, მეგობარო, შენ იმაზე ძლიერი ხარ, ვიდრე გგონია. ყველას ვთხოვ, უფრო კეთილად მოექცნენ ერთმანეთს. ბულინგი მიუღებელია, წერტილი", — ამბობს მსახიობი ვიდეოში.